InfoHub Logo

Сабақтың тақырыбы: «Көмірсутектер» тарауын қайталау
Сабақтың мақсаты:
Білімдік: оқушылардың «Көмірсутектердің негізгі кластары» тақырыбы бойынша алған білімдерін бір жүйеге келтіру, бекіту әрі бағалау.
Дамытушылық: Теңдеу құру дағдыларын, есеп шығару, химиялық тәжірибе жасау біліктерін дамыту. Оқушылардың логикалық жан – жақты ойлауын, сөйлеу қабілеттерін дамыту пәнге қызығушылығын арттыру.
Тәрбиелік: Оқушыларды бірлікке, ұйымшылдыққа, алғырлыққа, шапшаңдыққа, өз бетінше ізденіп, білім алуға дағдыландыру және тәрбиелеу
Сабақтың түрі:
Білімді қорытындылап, жүйелеу (қайталау) сабағы, Сайыс сабақ.
Сабақтың өткізілу формасы:
Жекелеген, жұптық, топтық жұмыстар. Жеке - дара, электрондық оқулықпен жұмыс.
Пәнаралық байланыс:
География, математика, орыс тілі, әдебиет, аймақтық компоненттерді қолдану.
Қажетті құралдар мен реактивтер:
Қазақстанның пайдалы қазбалар картасы, түрлі - түсті таратпалар, Алкандардың гомологтық қатары, плакаттар, үлестірмелі карточкалар, тест тапсырмалары, есептер жазылған карточкалар, электрондық оқулық, графопроектор, сызбанұсқалар, бағалау парағы, салыстыру кестесі, «Молекула құруға арналған атомдар модельдерінін жиынтығы» бөлшектері, пластилин, сіріңке шырпылары, буклеттер

Сабақ жоспары
Ұйымдастыру (Кіріспе сөз)
I. Топтарды таныстыру
II. Ой қозғау (Сауалнама сұрақтар)
III. Химиялық эстафета (өзгерістерді жүзеге асыруға есептер)
IV. «Көмірсутектерді салыстыру кестесі» деген қалталы кестені толтыру. Әр оқушыға «Көмірсутектерді салыстыру кестесі» деген үлестірмелер таратылыды.
V. Көмірсутек молекулаларының моделін жасау.
VI. Электрондық оқулықпен жұмыс жасау.
VII. Тест жұмысы
VIII. Қорытынды: «Ассоциация құру.»
IX. Оқушылардың білімдерін бағалау.
X. Үйге тапсырма беру.
I кезең. Таныстыру
Бұл турда әр топ өзін таныстырып өтеді
I топ «Алкан»
II «Алкен»
III топ «Алкин»

II кезең «Ой қозғау»
Cауалнама сұрақтары
Бұл турда әр топқа 6 сұрақтан қойылады, егер сұрақ қойылған топ оқушылары сұраққа жауап бермесе, онда сол сұраққа бірінші болып қол көтерген топ жауап беруіне болады.
(Бір жауапқа 1 ұпай беріледі).

І нұсқа. «Алкандар» тобына
1) Көмірсутектер қалай жіктеледі?
2) Метанды басқаша қалай атайды?
3) Алкандарға сәйкес көмірсутектерге қандай жұрнақ жалғанады?
4) Алкендерге қолайлы реактив не болып табылады?
5) Ароматты көмірсутектердің халықаралық атауы
6) Ашық түсті мұнай өнімдеріне не жатады?