InfoHub Logo

Тақырыбы: Қыс. Құстардың қысқы тіршілігі.
Мақсаты: Қыс мезгілінің ерекшелігімен таныстыру. Қыс кезіндегі құстардың тіршілігі туралы әңгімелеу арқылы балалардың қамқорлық жасауға
деген белсенділіктерін арттыру. Табиғатты аялауға баулу.
Көрнекілігі: суреттер, құстардың суреттері, қысқы ағаш, орманшы атай, үнтаспа.

Жүрісі:
Жылулық шеңбері.
Амансың ба, алтын күн,
Амансың ба, жер ана,
Амансың ба, достарым,
Сендерді көрсем қуанам!

Әңгімелесу.
- Қандай жыл мезгілін білесіңдер? Кәне, атап шығайық.
- Қыс, көктем, жаз, күз.
- Қазір жылдың қай мезгілі?
- Күз мезгілі.
- Күзде табиғатта қандай өзгешеліктер болады?
- Күзде күн салқындап, аспанды бұлт торлап, жиі – жиі жаңбыр жауады. Ағаштардың жапырақтары сарғайып, жерге түсе бастайды. Шөптер де сарғайып, қуара бастайды. Адамдар жылы киімдерін киеді. Құстар да жылы жаққа ұша бастайды.
- Есімізге түсіріп көрейік. Құстардың қандай түрлері болады?
- Үй құстары және дала құстары.
- Үй құстарына қандай құстар жатады?
- Әтеш, үйрек, қаз, тауық, күркетауық.
- Ал дала құстарына қандай құстар жатады?
- Қарлығаш, көгершін, торғай, шымшық, сауысқан, қарға, бүркіт, аққу, үкі, жапалақ.
- Күз түсіп, күн салқындағанда, кейбір құстар жылы жаққа ұшып кетеді деп айттыңдар. Оларды жыл құстары деп атаймыз. Жыл құстары суыққа төзімсіз болып келеді. Ал, енді жылы жаққа ұшпай, өлкемізде қыстап қалатын құстарды отырықшы құстар дейміз.
- Қыста күн салқындап, қар жауады. Айналаны аппақ қар басады. Кейде мінезін көрсетіп, қар жапалақтап жауып, ұйытқыған боран да борайды. Қыста өсімдіктер, ағаштар өспейді. Олар көктемге дейін ұйқыға кетеді. Тек шырша ғана жасыл күйінде қалады.

Әліппе – дәптермен жұмыс.
Т. Молдағалиевтың қыс туралы өлеңін оқып беру:
Ағаштардың жапырағын
Ашулы жел тонайды.
Ақ жамылған атырабым
Қар борайды, борайды.

Сұрақтарға жауап алу:
- Өлеңде қай жыл мезгілі туралы айтылған?
- Қыста күн қандай болады?
- Қар қалай жауады?

Сурет бойынша әңгіме жүргізу:
Қыс, құстардың қысқы тіршілігі туралы бейнеленген суреттер арқылы балаларға құстардың азығы, олардың немен қоректенетінін әңгімелеу. Адамдардың құстарға жасайтын көмектері туралы мағлұмат береді.