Ala qoılar
Aıyrsyn ańdar qaıdan qara, aqty,
Kimi aq, kimi qara - taba almapty.
Josparlap bilmegendi bildirýge,
Sóz qylyp danyshpandar mysaldapty.
Mysal bul: ala tústi keı qoılardy
Arystan - ań patshasy jaqtyrmapty.
«Bulardyń túsi bóten, kóńili ala», - dep,
Ne shara, súımegen soń, kiná taqty.
Ol ras, keı qoılardyń ala túsi,
Kim bilsin, syrty menen birdeı me ishi?
Áıteýir bir senbestik oı kirgen soń,
Ne qylsa, Arystannyń keler kúshi.
Demelik qoılardyń da ishi appaq,
Ońaı ma Arystannan alý aqtap?
Shyqqan soń senimsiz bop, bul qoılardy
Al endi Arystanǵa qalaı baqpaq?!
Bárin de qyryp júrip joq qylar ed,
Ańdardyń aýzyna kim bolar qaqpaq?
«Jazyqsyz qan tókti» dep aıtpastaı qyp,
Birtúrli buǵan kerek amal tappaq.
Shaqyrtyp Aıý menen Túlkini aldy,
Keńesip, ekeýine aqyl saldy.
Arystan is mónisin aıtqannan soń,
Kidirip Túlki azyraq, oıǵa qaldy.
Sóıleıdi oılanbaı-aq Aıý sholaq:
(Aıýlar kúshke myqty, oıǵa olaq)
«Qoılardan ala tústi qutylǵandaı,
Bar deımin buǵan ońaı jalǵyz jol-aq.
Munda onsha esh nárse joq oılaıtuǵyn,
İs emes onsyz jóni bolmaıtuǵyn.
Bárin de ala qoıdyń qyrsań, taqsyr,
Tuqymyn ne bar qurtyp, joımaıtuǵyn?».
Bul aqyl unamady Arystanǵa,
(Qan kerek bolsa, tabar alystan da)
Aıýdy túrtip qalyp, Túlki aıtady:
«Sózińdi men bólemin, namystanba.
Danyshpan ádil patsha, taqsyr hanym!
Jazyqbyz siz tókpeısiz nashar qanyn.
Qoılardan ala tústi qutylǵandaı,
Aıtaıyn, ruqsat etseń, men amalyn.
Olarǵa erkin júrip ottaǵandaı
Berińiz keń jaıylym, shóbi qalyń.
Senimdi jaqsy qoıshy tabylmasa,
Baqtyrmaı qasqyrlarǵa joq amalyń.
Kókjaldar júrer qoıdy baǵyp oınaı,
Oınaýyn qoımas, ábden qarny toımaı.
Qasekeń qoıdy baǵa bastaǵan soń,
Tuqymyn qoıar eken qalaı joımaı?!
Az dáýren oǵan deıin bul qoılar da
«Turmyz dep keńshilikte» júrsin oılaı.
Bilinbeı birte-birte quryp bolar,
Aslan jaman atyn sizge qoımaı!».
Arystan Túlki aqylyn qabyl aldy,
Bóriden óńsheń kókjal qoıshy saldy.
Qoılardy qasqyr baǵyp ońdyrar ma?
Ala túgil, aǵy da az-aq qaldy.
Al sonda ne dep aıtty ózge ańdar,
Qoılardyń taýsylǵanyn kórgen jandar?
«Jaryqtyq Arystannan esh kiná joq,
Buzyqtar qasqyrlar ǵoı, anturǵandar!».

* * *
Bul sózge degenim joq jylar, kúler,
Adam az aldyn boljap anyq biler.
Kókjaldar qoıshy bolsa, kim biledi,
Bereke ala qoıǵa kirse, kirer?!


You Might Also Like

Jańalyqtar

Jarnama