Anyq pen tanyq
Oılańyz, aqyl-bilim qaıda bolmaq,
Denede qandaı oryn-jaıda bolmaq?
Bilý, naný, unatý – aqyl ici,
Qaıtse zıan, qaıtkende paıda bolmaq?

Tán sezip, qulaq estip, kózben kórmek,
Muryn ıis, til dámnen habar bermek.
Beseýinen mıdaǵy oı habar alyp,
Jaqsy, jaman ár isti sol teksermek.

Oı sonda neshe tolǵaý shımaı salmaq,
Qaıtse jóni keler dep ólsheýge almaq.
Dál solaı qylaıyn dep unaǵanda,
Ádiletti júregiń bir qozǵalmaq.

Bir bılik sol júrekten shyǵarylmaq,
Denege ol shymyrlap áser qylmaq.
Oıyńdy durys deı me, teris deı me,
Sol arasyn anyqtap baıqa, biraq.

«Jaraıdy»‚– dep unasa, bas ızemek,
Jek kórse, jıirkenip dirildemek.
Júregińniń tili joq, ymbaly sol,
Uǵyp al da bola kór soǵan kómek.

Qazaqta joq aqylmen oı bekitpek,
Nápsi unasa bolǵany, bári bitpek.
Táýekel dep at qoıyp yqtımalǵa
Baılaýy joq nárseden paıda kútpek.

Tabamyn dep talpynyp oıyna almaq,
Óz álinshe o daǵy synǵa salmaq.
Az oılansa‚ qazaqtyń basy qatyp,
Zıan isti paıda dep qoıyp qalmaq.

Yqtımaldyń esigi ekeý bolmaq,
Ishine paıda, zıan... bári tolmaq.
Nysanany syǵalap dáldep atpaı,
Kózin jumyp oq atqan qaıtip ońbaq?

Is qylady taptym dep bizdiń qazaq
Onan kórgen paıdasy bolady az-aq.
Aıaǵynda ol isi zıan shyǵyp,
Kóringenge kúlkimen bolar mazaq.

Aram oımen ar satyp úzip-julmaq,
«Mine, paıda qyldym»‚– dep maqtan qylmaq.
Bireý bilgen aılany bireý bilip,
Ózi qurǵan daryna o da asylmaq.

Sholaq oılap, sholtańdap, syrttansymaq,
Asa myqty jan shyǵyp kózden tym-aq.
Aýdarysyp júrgende aýyp ketip,
Abyroıyń ashylar, baıqa, shyraq.

Sholaq oıdyń aıaǵy osy bolmaq,
Biraz kúnge kóńildiń hoshy bolmaq.
Arsyz, aram, asyǵys, aılakestik –
Munyń bári shaıtannyń dosy bolmaq.

«Qudaı kesher alda»‚ – dep kúná qylmaq,
Ar ketirip ant iship, jan satylmaq.
Ne jalǵanda, nemese aqırette
Ońa almastaı ókpeden bir atylmaq.


You Might Also Like