Óleń aıt daryn órge órlegendeı,
Sezimdi qozǵap, tátti oı kernegendeı.
Jandy sóz boıdy eritip, maýjyratyp,
Áldılep jyr besigi terbegendeı.

Qaýymnyń qalaýyna tap kelgendeı,
Bolǵanyn, bolashaǵyn aıt kórgendeı.
Kiristen tartyp jyrdy jebeli oqtaı,
Dál tıgiz qalaǵanǵa qas mergendeı.

Súısinip aqynǵa eli mán bergendeı,
Óleńmen ómirine sán bergendeı.
Qadalyp júregine aq qanjardaı,
Oıatsyn boıkúıezdi jan bergendeı.

Erikti bılep alsyn aıtylǵan jyr,
Syrty – gúl, jarasymdy, ishinde syr.
Janyńnyń lázzat alar jaryǵyndaı,
Máńgilik óshpeıtuǵyn tógilsin nur.

Úıirilip kókeıine uıyp jatsyn,
Tazartyp júrek kirin jýyp jatsyn.
Qańsyǵan shól dalany qanyqtyryp,
Jyr tasyp, darıadaı quıyp jatsyn.

Aryńnyń bolsyn óleń aınasyndaı,
Kórikti, kóptiń ortaq paıdasyndaı.
Josylyp jatsyn artta jortqan joly,
Aryndy asqaq ózenniń arnasyndaı.

---