Aýrý júrek aqyryn soǵady jaı,
Sharshap qalǵan keýdemde týlaı almaı.
Keıde ystyq qan basyp ketedi ony,
Dóńbekshigen túnderde tynshyǵa almaı.

Qarańǵy sańyraý qaıǵy oıdy jeńgen,
Erkelik pen dostyqty aýrý kórgen.
Aqyly joq, ary joq shýyldaqty
Kúnde kórip, tul boıy jıirkengen.

Tiriltip ótken kúndi, taǵy shóldep,
Osy kúndi kún demes qarǵap, mindep.
Keıde tilep baq penen taǵy tynyshtyq,
Keıde qaıǵy, azapty taǵy da izdep.

Keıde oılaıdy jylaýǵa qaıǵy zaryn,
Tynyshsyz kúnde oılaǵan derttiń bárin.
Keıde onysyn jasyrar jurttan urlap,
Ketirer dep mazaqtap bettiń aryn.

Aýrý júrek aqyryn soǵady jaı,
Óz dertin tyǵyp ishke, bildire almaı.
Keıde ystyq taǵy da qan basady,
Keıde bir sát tynshyǵar ún shyǵarmaı.

---