InfoHub Logo

Qoshtaı bir baıdyń jylqysyn baǵyp jumysyn istep júrgende sol úıge bir qonaq kelipti.

— Qonaqtarǵa mal ákel, — depti baı Qoshtaıǵa bir kezde:

— Mal deısiz be? Sonda bul kisilerge qoı ákelemin be? Qozy ákelemin be? Taı ákelemin be? Taıynsha ákelemin be? Qaısysyn unatar eken, a? — dep turyp qalǵan eken ol.

— Táıt, aqymaq, syı kisilerdiń aldynda ádepsizdik isteme! — depti onyń syryn biletin baı zekip.

Sonan Qoshtaı qoradan bir baǵlandy ákelip bata tilep, alyp soǵyp, terisin úıektep sydyrypty da, ashabaqanǵa ilip jiberip, úıekti bar kúshimen tartyp kep qalǵanda aıaq jaqta otyrǵan bala qonaqtyń ústine baryp shalqasynan túsipti.

— Úı, anturǵan, qozydan úıek alǵany nesi munyń? — depti baı.

— Myna bala qonaqtyń tartpa aıyly tozyńqy eken. Soǵan bir myqty aıyl uryp beremin be dep edim, — depti ol.

Azdan soń mazdap janyp turǵan otqa bas úıte bastaıdy.

— Úı, ońbaǵan, jaı úıt, — depti baı taǵy da. Qoshtaı shyǵa jónelipti. Azdan soń kıiz úıdiń esigin shalqasynan qaıyryp jiberip:

— Keıin turyńdar, jol bosatyńdar, — dep aıǵaılapty syrttan. Qarasa Qoshtaı basty ózin syryqqa shanshyp alyp, atqa minip alyp, esik aldynda tepektep tur eken deıdi, úıdegiler dý kúlip, jyrǵap qalypty.

Qoshtaı úlken qazannyń esik jaq daldasynda otyryp, tobylǵynyń sıdamynan sadaq jasap alypty da, anda-sanda álgi bala qonaqty syǵalap kezep-kezep qoıady eken. Bala qonaqta budan seskenip otyrsa kerek. Sadaǵyn balanyń kózine dáldep kezep otyrǵan Qoshtaı bir kezde «tars» dep aıǵaılap qalǵanda oqys shoshyp, jasqanyp qalǵan bala qonaq júktegi kúmis erdiń qasyna basyn soǵyp alypty:

— Paı, paı, batyryńnyń júrektisin-aı, — dep Qoshekeń qarq-qarq kúlgen eken.

---