InfoHub Logo

Qazaqstan aýmaǵynda tótenshe jaǵdaı jarıalanýyna baılanysty elimizdiń barlyq bilim berý mekemeleri men oqý oryndary qashyqtan oqýǵa kóshti. Tek oqýshylar men ustazdarǵa ǵana emes, sonymen qatar ata-analar qaýymyna da tańsyq formattaǵy onlaın oqý ádisi alǵashynda kóńilge úreı uıalatqany ras.

Bilim jáne ǵylym mınıstrliginiń úılestirýimen 6 sáýirden bastap tórtinshi toqsannyń beınesabaqtary respýblıkalyq «El arna» jáne «Balapan» arnalarynan kórsetilýde. Alǵashqy sabaqtar jurtshylyq arasynda úlken talqy týǵyzdy. Aıtylǵan pikirler áralýan. Osy oraıda, biz beınesabaqtardyń túsirilim alańyndaǵy jazylý prosesi týraly tolyǵyraq tanystyrǵymyz keldi.

Oqýshylar tórtinshi toqsanda qamtýy tıis 3 myńnan asa sabaqtyń vıdeo nusqasyn túsirip, daıyndaýdy «Bilim Media Group» kompanıasy óz moınyna aldy.

Elimizdiń bilim berý salasyna tyń ózgerister ákelip, qashyqtan oqýǵa arnalǵan kontent ázirleýde mol tájirıbe jınaǵan «Bilim Media Group»-tyń  qyzmet keńsesi áp-sátte telestýdıaǵa aınalǵan. Az ǵana ýaqyttyń ishinde dekorasıalar qurylyp, kabınetter vıdeo stýdıa tehnıkasymen jabdyqtalypty. Kompanıa dırektory Raýan Kenjehanulynyń Facebook áleýmettik jelisinde jarıalaǵan jazbasyna súıensek, onlaın sabaqtardy ázirleý úshin naýryzdyń 23-inen bastap 150 muǵalim men 60-tan asa qyzmetker 8 stýdıada demalyssyz jumys istep jatyr. Karantın jaǵdaıyna qaramastan, jedel shyǵarmashylyq top qurǵan kompanıa muǵalimder men oqýshylardy qoldaý úshin óz tarapynan bar múmkindikti jasaýda.

Qashyqtan oqytýdy qamtamasyz etýge atsalysatyn mamandardyń úzdiksiz jumysyn qamtamasyz etý úshin, qatynaý kóliginen bastap ystyq tamaqqa deıin - barlyq jaǵdaı jasalǵan. Eń mańyzdysy - medısınalyq tekserý men kómek usynatyn dáriger de bar. Maska, qolǵap, qol tazalaǵysh sekildi medısınalyq buıymdar mol daıyndalǵan. Eldegi tótenshe jaǵdaıǵa baılanysty jumys ornyndaǵy qaýipsizdik sharalary qatań saqtalady.

Tótenshe bilim alańyna aınalǵan ujym kóp telearnanyń úlken daıyndyqpen jasaıtyn bir jyldyq josparyn nebári birer aptada oryndap jatyr desek artyq aıtqandyq emes. Bekitilgen sabaq kestesine sáıkes kún saıyn 60 beınesabaq jáne 10 anımasıalyq tanymdyq beınematerıal efırge shyǵady. Demek, oqýshylarǵa aptasyna uzaqtyǵy 60 saǵatqa sozylatyn eki tildegi 300 sabaq usynylady. Bul kún saıyn teleefır talaptaryna saı jasalǵan 12 saǵat mazmun. Karantın jaǵdaıynda bilikti maman men tehnıka sanynyń jetispeýine qaramastan, 2 apta ishinde 800 beınesabaq túsirilip, onyń teń jartysy montajdan ótken.

Beınesabaqtardyń mazmunyna qatysty kórermender tarapynan keıbir syn pikir de aıtyldy. Bul týraly №66 mektep-lıseıiniń fızıka páni muǵalimi Álimjanova Gúldana Ramazanqyzy óz oıymen bólisken bolatyn:

Muǵalim – ártis nemese telejúrgizýshi emes, sol sebepti alǵashqy ýaqytta kamera aldynda arnaıy daıyndyqsyz sabaq júrgizý qıyndyq týdyrǵany ras. Degenmen, munda bizge efır redaktorlary men stýdıadaǵy mamandar óte kóp kómek kórsetedi. Oqýshylar men ata-ana úshin bul tek on mınýttyq sabaq bolýy múmkin, óıtkeni olar túsirilim alańyndaǵy qıyndyqtardan beıhabar. Balalardyń jańa taqyrypty tolyq meńgerip shyǵýy úshin, biz sabaq materıalyn daıarlaýdan bólek, kamera aldyndaǵy daıyndyqty da qatar alyp júrýge tyrysamyz. Munyń ózi úlken jaýapkershilikti talap etedi. Sondyqtan oqýshylar men ata-analar qaýymynan túsinistik tanytýyn suraımyz.

Efırdi kórýge úlgermeı qalǵan oqýshylar beınesabaqtar men qosymsha tapsyrmalardy, sondaı-aq sabaqty bekitýge arnalǵan jattyǵýlardy bilimland.kz saıtynda táýligine 24 saǵat tegin «Online Mektep» bóliminen qaraı alady. Kompanıa mamandary saıttyń oqýshylarǵa qolaıly ári túsinikti bolýy úshin, qoldanýǵa jeńil, qarapaıym fýnksıalardy engizgen. Sonymen birge, muǵalim men oqýshy arasynda keri baılanys ornatý, úı tapsyrmalaryn tekserý men baǵalaý sekildi múmkindikterdi júzege asyrý tetikterin de oılastyrǵan. Osynyń arqasynda, tórtinshi toqsannyń eń alǵashqy oqý kúni saıtqa 800 000-ǵa jýyq qoldanýshy kirgenine jáne eshqandaı tehnıkalyq aqaý oryn almaǵanyna bárimiz birge kýá boldyq.

Uıymdastyrýshylar beınesabaqtar ázirleýde áli de bolsa olqylyqtardyń baryn jasyrmaıdy. Bul shyǵarmashylyq, al kez-kelgen shyǵarmashylyqta kemeldiktiń shegi joq.

Biz bul jaýapty jumysqa atsalysyp jatqan ustazdar men osyndaı kúrdeli isti óz qolyna alǵan áriptesterimizge tek sáttilik tileımiz!

---