Epti tyshqan bıdaıdy tası bergen...
Epti tyshqan bıdaıdy tası bergen,
Shákirti de kóp eken qasyna ergen.
Qaqpan qurǵan adamnyń aılalaryn
Alyp tastap, jem jegen talaı jerden.

Ózge tyshqan úırenip ol ónerden,
Talaı qıyn orynnan tamaq tergen.
Bir kúni basshy tyshqan kezip júrip,
Aýzyn myqtap bekitken kúbi kórgen.

Tátti irimshik ıisi murnyn jaryp,
Tesik jerin taba almaı bolǵan ǵaryp.
Buryn shúmek ornatqan bir jeri bar,
Árqashan tyrmalaıdy sony baryp.

Neshe kúndeı qajalap tesken sony,
İzdegen maqsutyna jetken qoly.
Ómirlik azyq qylyp jataıyn dep,
Joldasynan jasyrǵan aıtpaı ony.

Aldynan uıa jasap, jatqan buǵyp,
Qarny ashsa júredi kirip, shyǵyp.
Joldasynyń bireýi kele jatsa,
Tesikke qoıady eken tyǵyn tyǵyp.

Jıylyp keldi bir kún shákirtteri:
«Sizdi bir kórmedik,– dep,– kópten beri
«Tyshqan kóp» dep tamaǵyn tyqty bul el,
Ala almadyq qıyn bop qoıǵan jeri.

Biz ash júrmiz solaı bop birtalaıdan,
Ońaı tamaq tabylar endi qaıdan.
Kópti kórgen aılakes batyr ediń,
Taǵy da tıer me eken bizge paıdań».

Ol aıtty: «Táýba qyldym sopy bolyp,
Urlyq qylǵan kúná ǵoı eldi toryp.
Munan bylaı kelmeńder maǵan jaqyn,
Keýdeme ketti búgin ıman tolyp.

Qasyma kele berseń, kúnáń juǵar,
Urlyqty oılap oıymnan ıman shyǵar.
Ashtan ólip qalýǵa rızamyn,
Endi urlyqqa bolmaımyn tipti qumar».

Oılasam, sol tyshqandaı buzyqtar kóp,
Syrty sopy, ishi aram qylyqtar kóp.
Para alyp, ne qazynanyń aqshasyn jep,
Adalymsyp júretin ulyqtar kóp.

Bir emes, ár jerde bar osyndaılar,
Óz malyn ózi urlaıdy keıbir baılar.
Qazyna bergen aqshany qaltaǵa sap,
Elge mindet keńseshil pysyqaılar.

Bir urty maı, bir urtynda qandar da bar,
Qoı terisin jamylǵan jandar da bar.
Jazasyzdy jalalap ataq alyp,
Aq júreksip júretin pańdar da bar.

Aramdyqpen jetkizip kókke qolyn,
«Kámónós» bop alady joǵary oryn.
Tartylsa anyq ádil tarazyǵa
Bir-aq kúnde qaınatar onyń soryn.


You Might Also Like

Jańalyqtar

Jarnama