Muny oqyǵan ulandar,
Úmbeteı jyryn tyńdańdar!
Baıqap oqyp árbirin,
Aqylǵa salyp bar syryn,
Ne dep otyr, kór túrin.
Abylaıdyń aldyna,
Salyp otyr, kórdiń be,
Basynan keshken taǵdyryn,
Syrtyn uqpa, muny ańǵar!
Búgingiler aıtsa jyr,
Býyny birdeı bári bir.
Úmbeteıshe qubyltyp,
Sala almaıdy basqa túr.
Taqyldatyp aıtsaq ta,
Uıqasqa jyldam qaıtsaq ta,
Aıaqty birdeı bassaq ta,
Shyqpaıdy bizden tereń syr.
Jyrdyń jaıyn bilmeıtin
Bizde osyndaı ylań bar.

Eski aqyn bizden áli artyq,
Ol kezde týǵan bala artyq,
Jasymyzdan shal artyq,
Taqpaq pen maqal taǵy artyq,
Sýyryp salma jaǵy artyq.
Aıtady olar oılanbaı,
Sypyra jyraý, Shortanbaı,
Úmbeteı men Marabaı,
Aldy-artyna qaramaı,
Soqqanda jyrdy sýyldap,
Jel jetpeıtin qulandar!

Eski jyrdyń uıqasy –
Biri qysqa, biri uzyn,
Býyndary buzyq dep,
Biz baspaımyz ol izin.
Nege bulaı aıtty dep,
Synamaımyz negizin.
Oılaı kelsek, eski jyr
Salady tulpar júrisin,
Mine, baıqa munysyn.
Keıde jorǵa, keıde jel,
Buldyr qaǵyp asar bel.
Keıde aryndap, keıde shap,
Adymyn alys qulashtap,
Alady keıde tynysty.
Solqyldatyp júristi,
Osyndaı jyrdy unańdar!

Eski jyr keıde sıpattar
Qyran qustyń ushqanyn.
Qumaryna quıylyp,
Qanatty qomdap qysqanyn.
Jelge qarsy jelbirep,
Aspanǵa qaıta shyqqanyn.
Qaıshylap qanat qaqqanyn,
Asyǵyp kele jatqanyn,
Atylǵan oqtaı aqqanyn.
Keıde qaqpaı qanatyn,
Juldyzdaı aǵar syzylyp,
Aldyńǵy túrden buzylyp,
Qarasy keter úzilip.
Eski jyrda kórneý tur,
Osynyń bári bilinip,
Aqynnyń syryn kim ańdar!

Keıde kúnniń raıyn,
Sıpattaǵan tusy bar
Bir aıy men bir aıyn,
Jazy, kúzi, qysy bar.
Qarly boran, qara jel,
Buldyr qaǵyp asar bel.
Jazǵy saǵym jaı tańdap,
Degendeı bop muńda kel.
Keıde burshaq, keıde qar,
Keıde jaýyn, kóp nóser,
Á degenshe ashylyp,
Aptyqqan jeli basylyp,
Qulpyrmaı ma taý men jer?
Eski jyrdy kórseńiz,
Oılanyp kóńil bólseńiz,
Syryna baǵa berseńiz,
Tań qalarlyq isi bar,
Kóńildi tartar kúshi bar,
Asyqpaı tyńdap, shydańdar!
Keıde jyrshy aıtady
Aq bókenniń júrisin.
Zyrqyrap baryp qaıtady,
Alady taǵy tynysyn.
Tórt aıaǵy kórinbeı,
Buldyrap jeler erinbeı.
Keıde qarǵyp ketedi,
Ylǵı jelip, kerilmeı.
Jarq berip, bult etedi,
Burynǵy betten burylyp,
Jel-saǵymdaı qubylyp,
Barǵan saıyn shynyǵyp,
Keıde aıańdap, tynyǵyp,
Aıtylsa soǵan qısynyp,
Ketedi boıyń ısinip.
Oınaǵandaı qulyn-taı,
Jyrda bolar talaı jaı,
Ketpeńizder baıqamaı,
Bolasyń áli buǵan zar!

Keıde aıtady aqyndar
Jaıdary jeldiń soǵysyn.
Qataıyp, keıde baıaýlar,
Túrlendirip dolysyn.
Keıde aqyryn sybyrlap,
Jıileý basyp, jybyrlap.
Áketer aldap oıdy urlap,
Keıde keter syrqyrap.
Quıyndaıyn burqyrap,
Taǵy da jelpip, ýantyp,
Jas baladaı qýantyp,
Aınalyp kelip basady,
Bas qısynnyń toǵysyn.
Qate deme onysyn,
Anyqtap uq sonysyn,
Shataq uqpa, shyn ańǵar!

Keı aqyndar mysaldar
Móldir sýdyń aqqanyn
Arystandaı arqyrap,
Kúrildep kelip, sarqyrap,
Baıaýlap baryp aqyryn,
Jatady kúnge jarqyrap.
Minińdi tyrnap ashytar,
Jigerińdi tasytar,
Tátti sózi baldaı bop,
Nasıhaty shamdaı bop,
Qasıeti qandaı kóp,
Eljiretip súıekti,
Bergendeı bop tilekti,
Qyshyǵan jerdi qasytar.
Mine, osyny bilip al!
Jaqsy aqynnyń tili bal,
Ótirik deme, oıǵa sal!
Osyny jattap uǵyp al,
Aqyndyqqa qumarlar!

---