![Farıza Ońǵarsynova](http://infohub.kz/uploads/thumbnail/20240120175110800_big.png)
- 16 naý. 2015 00:00
- 249
Farıza Ońǵarsynova
Farıza Ońǵarsynqyzy Ońǵarsynova - qazaq aqyny, halyq jazýshysy, jýrnalıs, Qazaqstan Respýblıkasy Parlamenti Májilisiniń I jáne II shaqyrylymdarynyń depýtaty (1996-2004). Farıza Ońǵarsynova 1939 jyldyń 5-jeltoqsanynda Gýrev (qazirgi Atyraý) oblysy, Novobogat aýdanyna qarasty Manash aýylynda týǵan. 1961 jyly Gýrev memlekettik pedogogıkalyq ınstıtýtynyń til-ádebıet fakúltetin bitirip, Balyqshy aýdanynyń Erkindala, Oktábrdiń 40 jyldyǵy atyndaǵy qazaq mektebinde ustazdyq etken. 1966-1968 jj. Gýrev oblystyq «Komýnıstik eńbek» gazetiniń partıa turmysy bóliminde ádebı qyzmetkeri.
1968-1970 jj. respýblıkalyq «Lenınshil jas» (qazirgi «Jas alash») gazetiniń Aqtóbe, Gýrev, Oral oblystary boıynsha menshikti tilshisi qyzmetin atqarǵan. 1970-1978 jj. respýblıkalyq «Qazaqstan pıoneri» (qazirgi «Ulan») gazetiniń bas redaktory, 1978 j. jeltoqsannan «Pıoner» (qazirgi «Aq jelken») jýrnalynyń bas redaktory. Alǵashqy óleńderi baspasóz betterinde 1958 jyldan bastap shyqqan. Ár jyldary 20-dan astam óleń jınaqtary, ocherkteri, tańdamaly shyǵarmalary, «Bizdiń Kamshat» povesi, aýdarmalary «Jazýshy», «Jalyn», «Molodaıa gvardıa» baspalarynan jaryq kórdi. Farıza Ońǵarsynovanyń óleńderinde jasandylyq joq, azamattyq lırıkasy synshyldyǵymen, qoǵamdaǵy, adam minezindegi keleńsiz tustardy dál nysanaǵa alýmen erekshelenedi. Lenın komsomoly Ortalyq Komıtetiniń, Qazaq KSR Joǵarǵy Keńesiniń Qurmet Gramotalarymen, «Qurmet Belgisi», «Parasat» (2001) ordenderimen marapattalǵan. Respýblıka mádenı-aǵartý isine eńbegi sińgen qyzmetker. 2014 jyldyń 23 qańtar kúni Astana qalasynda uzaq syrqattan dúnıeden ótti.
Farıza Ońǵarsynqyzynyń keıbir týyndylary:
Jaqsylyq týraly jyr
Maqataev týraly jyr
Men ózimniń jaýlarymdy óle qal dep eshqashan qarǵamaımyn
Dúnıe bos qaldy ǵoı sen ketkeli
Aqqaıyńǵa aınalyp soqqan júrek týraly
Ánmen qaǵyp aspannyń qaqpalaryn...