Ǵıbratnama
Iapyrmaı, kessem be eken men tilimdi,
Úırendim qaıdan óner, kóp bilimdi.
Ótkizdim qasiret pen qapalyqta
Qyzyqty oınap-kúler mezgilimdi.
Boldym ǵoı ónerimdi taýysqandaı,
Mert bodym aıǵa shaýyp arystandaı.
Suńqardaı bıik shyńdy meken qylmaı,
Shyqyldap kózge tústim saýysqandaı.
Sóıleýden tyıylmaǵan qyzyl tilim,
Óttiń be zarlaýmenen, qaıran kúnim?!
Túlkiniń qyzyldyǵy ózine sor
Bolǵandaı boldyń maǵan, óner-bilim!
Aınaldym bult bolyp bıik taýǵa,
İlindim bolyp shortan jibek aýǵa.
Tili joq kóp mylqaýlar tıysh jatyr,
Qyzyl til, sen basymdy saldyń daýǵa.
Bul kúnde altyn azyp, jez bolypty,
Dúnıede jaqsy-jaman sóz bolypty.
Gúl izdep Gúlstanda júrgen bulbul
Bir kúni qarshyǵaǵa kez kelipti.
Surapty qarshyǵadan sonda bulbul:
-Jalǵanda yntyzarym-bir qyzyl gúl.
Qarshyǵa, sen de qussyń, men de quspyń,
Aqylyń seniń menen emes qoı mol.
Bekterdiń oń qolynda turaǵyńyz,
Ertteýli kúnde júırik pyraǵyńyz.
Kekiliktiń mıy menen júregin jep,
Tabylǵan árbir qustan muradyńyz.
Tatısyń qymbat baǵa, qadir pulǵa,
Júresiń patshalarmen shyǵyp jolǵa.
Jazym bop, jazataıym tússeń torǵa,
Túsirmeı áketetin qoldan-qolǵa.
Ótkizdim men árbir túndi saıraýmenen,
Basymdy tikenekke baılaýmenen,
Kórem dep qyzyl gúldiń ashylǵanyń,
Uzyn tún zyǵyrdanym qaınaýmenen.
Qyzyl gúl men uıyqtamaı ashylmaıdy,
Kózimshe aýzy ashylyp shashylmaıdy.
Oıansam uıyqtap ketip, ashylady,
Qasiretim bir kóre almaı basylmaıdy.
Qarshyǵa keldi sonda jaqyndasyp,
Bulbulmen sóılesýge jaýaptasyp:
-Qus ishinde sen aqymaq, aqylyń joq,
Bir gúlge paıdasy joq bolǵan ǵashyq.
Aýzyńdy, aqylyń bolsa, jabar ediń,
Úndnmeı, sabyr qylyp baǵar ediń.
Tili joq men sekildi mylqaý bolsań,
Bir kúnde myń muratty tabar ediń.
Eı, bulbul, aqylyń joq netken ersiń,
Aýzyńdy jappaǵannan opyq jersiń!
-Tabarym mylqaý bolyp murat bolsa,
Bolmaǵan hasyl murat kete bersin.

Murnyńdy shoshaıtasyń maqtaǵanǵa,
Júrýshi eń kelemej bop kók taǵanǵa,
Qolynda kóringenniń bolyp tutqyn,
Máz bolyp búresiń de saqtaǵanǵa.
Bermeıdi saǵan etti qanymenen,
Bir qustyń toıattatar sanymenen.
Ózińdi erteden-kesh ashyqtyrar,
Qus kórinse, alsyn dep janymenen.
Bir urttam qan ishersiń bir qus alsań,
Sen aqymaq, tamaq úshin bolǵan sarsań.
Arbakesh sarttarǵa qul bolǵansha,
Onan da jaqsy emes pe óle qalsań.
Jaratqan bir Qudaıǵa jeter dátim,
Zarlaǵan uzaq túnder minájatym,
Bitpese bir muratym, ketsin, barsyń,
Ǵalamǵa dastan bolǵan bulbul atym!


You Might Also Like