Jaǵympazdyń sońǵy qatesi

Baǵzy zamanda bir qalanyń aqkóńil ári óte jaqsy bir basqarýshysy bolypty. Basqarýshy tanysa da, tanymasa da eldiń bárimen amandasyp, jaǵdaıyn suraıdy eken. Ózine isi túskenderge de qýana kómektesedi.

Bul aqkóńil basqarýshynyń bir jaman minezi kim ne dese soǵan birden senedi eken.

Kúnderdiń kúninde basqarýshynyń janyna jaǵympaz jáne ózimshil bir kómekshi taǵaıyndalypty. Biraq ol qala halqyna múlde jaqsy qaramapty. Kóńilinen shyqqanǵa kómektesip, kóńili qalamaǵanǵa kómektespepti. Ári unatpaǵan adamdaryn basqarýshyǵa jamandaıdy eken.

Ýaqyt óte kele qala turǵyndary oǵan renishin bildire bastapty. Halyqtyń basqarýshyǵa degen kózqarasy da burynǵydaı emes, ózgere bastapty. Halyqtyń bul narazylyǵy padıshahtyń da qulaǵyna jetipti.

Padıshah basqarýshyny sol kúnge deıin eshqashan kórmegen, biraq jasaǵan isterine qaraı ony unatady eken. Sondyqtan ony óz kózimen kórmeı, surastyrmaı qyzmetinen shyǵarǵysy kelmepti.

Bir kúni ústindegi kıimin aýystyryp, aqkóńil basqarýshynyń turyp jatqan qalasyna barypty. Qonaqúıde ony aldymen basqarýshynyń jaǵympaz kómekshisi qarsy alypty. Ústindegi kıimin aýystyrǵan padıshahty tanymaı, odan ne qalaıtynyn ashýlanyp surapty. Padıshah oǵan:

– Óte mańyzdy bir is úshin aýyl aǵasymen kezdeskim keledi, – dep jaýap beripti. Kómekshi:

– Basqarýshynyń quzyryna kelýge qalaı ǵana seniń batylyń barady. Jyldam ket, bul jerden, – dep aıqaı salypty. Padıshah:

– Meniń óte bir mańyzdy isim bar. Mindetti túrde ony kórýim kerek, – dep aýzyn ashyp jıǵansha, jaǵympaz qyzmetshilerdi shaqyryp, padıshahty qýyp jibermekshi bolypty. Sol kezde kúńgirlegen daýysty estigen basqarýshy ne bolyp jatqanyn surapty. Padıshah:

– Qurmetti basqarýshy, sizben kóriskim kelip edi. Kómekshińiz ruqsat bermedi, – depti. Basqarýshy da padıshahty tanymaıdy eken, biraq «Kelińiz, kelińiz» dep kúlimsirep jyly shyraı tanytyp sálemdesipti. Sózin ótkize almaǵan kómekshi birden araǵa túsip, basqarýshyǵa: «Qymbatty basqarýshym, men bul adamdy jaqsy tanımyn. Sýaıttyń bireýi. Abaılańyz onymen kezdesseńiz basyńyzǵa bále keledi» – dep, padıshahty kezdespeýge kóndiripti. Sosyn oǵan:

– Basqarýshynyń bir jumysy bar. Senimen kezdespeıdi, – depti.

Padıshah saraıyna renjip qaıtypty. Sol kúni habar jiberip, basqarýshy men kómekshisin saraıǵa aldyrypty. Ekeýi de padıshahtyń quzyryna kelipti. Padıshahtyń aldynda kómekshiniń jerge ıilgeni sonshalyq, padıshah birazǵa deıin onyń júzin kóre almapty. Biraq basqarýshy tabaldyryqtan attaı sala, padıshahty tanyp, júgirip baryp onyń qolyn súıip, keshirim surapty. Jaǵympaz sol kezde ǵana padıshahtyń betine qarap, istegen qateligin túsinip, padıshahtyń aıaǵyna jyǵylyp, keshirýin ótinipti. Biraq padıshah jaǵympazdy keshirmeı, jumystan qýyp jiberipti. Aqkóńil basqarýshyǵa basqanyń yǵymen ketpeı, óz kóńiliniń qalaýynsha áreket etýin jáne sheshim qabyldaıtyn kezde birneshe kisiniń oıyn bilip, soǵan qaraı sheshim qabyldaý kerektigi jóninde keńes beripti. Basqarýshy padıshahtyń keńesterin sol kúnnen bastap júzege asyryp, qaıtadan qala halqynyń seniminen shyǵypty.


You Might Also Like