Jasymnan jetik bildim túrik tilin,
Sol tilge aýdarylǵan barlyq bilim,
Erinbeı eńbek ettim, eńbek jandy,
Jarqyrap qarańǵydan týyp kúnim.

Oıatqan meni erte – Shyǵys jyry,
Aınadaı aıqyn boldy álem syry.
Talpynyp orys tilin úırenýmen
Nadandyqtyń tazaryp, ketti kiri.

Tanbaımyn, shákirtimin Tolstoıdyń,
Aldampaz, aram sopy kápir qoıdyń.
Janymen súıdi ádilet‚ ardyń jolyn,
Sondyqtan ol ıesi tereń oıdyń.

Tolstoı kápir emes, kápir óziń,
Din emes – bári aldaý aıtqan sóziń.
Kóńiliń soqyr, nadansyń, beıiliń qara,
Nur, jaryǵyn qalaısha kórsin kóziń.

Kónbeımin dindi teris burǵanyńa,
Sopynyń bara qoıman qurbanyna.
Haqıqat syrymdy aıtsam – Tolstoıdyń
Myń sopyny almaımyn tyrnaǵyna.

Adaspaısyń aqyldy, arlyǵa erseń,
Jolaı kórme jylmaıy sopy kórseń.
Tapqyr, adal, aq nıet adamdardyń
Aldanbassyń artynan ere berseń.

---