Jylym – qoı, juldyzym – ıýl,
Jasym – jeti júz on jeti aı.
Tolyq alpys bolady jyl,
Qosylsa ıýn, aprel, maı.

Qazaqshylap esep qylsam,
Besinshi múshelim – bul san.
Ólim qashan‚ ómir qansha‚
Emes ol biz bilerlik jaı.

Tirliktiń túrin kórdim,
Kóńildiń súıgenin berdim.
Jemis dep, bilmeı ý terdim,
Bola almaı shyn ǵylymǵa baı.

Talaıdan bar bir oı mende:
Bul álemdi jaratqan ne?
Joǵala ma jan ólgende,
Túzý jol, ister is qalaı?

Ne syr bar din degen jolda,
Kitap, tápsir, qoja molda...
Boıaýly bir shataq ol da,
Synarlyq qarýym joq saı.

Ol oıdy júr edim qaǵyp,
Qumar, paıda, ataq baǵyp.
Izdenbeı qalǵamyn naǵyp,
Kezegin ótkizip, dúnıe-aı!

Qaz ilgen lashyn em kólden,
Jas ótti tórt penen nolden.
Azaıyp ot-jalyn sóngen,
Darıǵa, kárilik, qaza-aı.

Alaqtap izdedim qarý,
Bekigen artyma barý.
Kerek bop kóp ǵylym tabý,
Bolyp tur kún qarań, aı‚ haı!

Oryssha‚ ne arabshadan
Tilim joq jetilip alǵan.
Kitap oqyp túrik jazǵan,
Uǵyndym osyny azǵantaı.

Ǵylymnyń‚ dinniń kitaptaryn,
Jazypty túrikshe bárin.
Fılosof, bilgish oılaryn,
Sezindim birazyn baıqaı.

Kitap, ǵylym, oı almaqqa‚
Maǵan jol boldy sol jaqta.
Jumyldym Meke barmaqqa,
Alań bolyp‚ ishe almaı shaı.

Parohodpen aı júrip jolda,
Ár elde kez kelip molda,
On úsh kún bop Stambolda,
Kerek kitap tabylǵany-aı!

Parıjde de oqyǵan jan,
Túrik, serkesh ám Úndistan,
Arab, bashqurt, qyzylbastan,
Perevodchık – túrik, noǵaı.

Solarmen kirisip sózge,
Joǵarǵy oı-maqsatym ózge,
Túsip sáýle soqyr kózge,
Aýyr tuman ashylýy-aı!

Ol oıǵa kóp kerek tarmaq,
Ár tilden slovar almaq.
Synap naǵyzyna nanbaq
Nadanǵa bolmady-aý ońaı!

Sol oıdy bes jyl jazdym,
Arydym, sharshadym, azdym.
Kóp ınemen qudyq qazdym,
Syrym, oıym‚ jaıym solaı.

«Neden barmyn? Ne qylǵan jón?
Joǵala ma jan ólgen soń?» –
Bul úsh oıdy elemegen,
Talap-oısyz, eser, báńgi-aı!

---