İ
Ólsheýsiz, túpsiz tereń bir darıa bar,
Kórmeımiz, qur estımiz anyq habar.
Darıanyń sýyn túgel quıatuǵyn,
Ol sıarlyq ydys bar kishkentaı, tar.
Darıany sol ydysqa quıa bilseń,
Kerek sýy bolady kózge daıar.
Onda biraq darıany estimeımiz,
Kózben anyq kóremiz, baıqa, dos-jar.
Ol sýda ylaı da bar, tunyq ta bar,
Ylaı sýdan tunyqty kim aıyrar?
Ylaı sýdan tazasyn aıyrýǵa
Darıa kórgen adamnyń bári qumar.
Darıa ne, ydysy ne, tazasy ne?
Kórgen kim, aıyrǵan kim – tabyńyzdar.
Bes sheshýi bir jerden tabylmasa,
Sheshken emes birtalaı oı sandalar.

II
Tamam sózdi sóıleıdi, sóıle dese,
Etinen et kesemin, sóılemese.
Aıt desem, aıtpaıtuǵyn jaýaby joq
Súıgenimdi sóılettim áldeneshe.

III
Bir nárse jurtqa málim, kózden ǵaıyp,
Ustaýǵa esh bolmaıdy, qoldan taıyp,
Ne synap, ne tústeýge uqsamaıdy,
Keıde kóp, keıde keter tipti azaıyp.

IV
Kıim, tamaq, deneden joq bir nusqa,
Jyldam kirip, shyǵady jyldam tysqa.
Mańdaıda jalǵyz kózi jarqyraǵan,
Tulymynyń biri uzyn, biri qysqa.
Keı-keıde eki uryqtaý minezi bar
Shaǵyp alyp júrmesin, baıqap usta.
Bir ketken soń qolyńa túsý qıyn,
Aırylyp qalyp júrme qapylysta.
Sharshaý joq, aryqtaý joq, talaby joq,
Adam ony jumsaıdy kóp jumysqa.

V
Toǵyz qatyn jıylyp bir tolǵatqan,
Birin-biri býaz ǵyp, jýandatqan.
Toǵyzynyń kıimi toǵyz túrli,
Kelgen kisi sıaqty ár taraptan.
Bosanǵanda, toǵyzy bir ul taýyp,
Balaǵa eki túrli kıim japqan.
Bir kıim sheshesine uqsasa da,
Bir kıimi kelip tur bóten jaqtan.
Qatyndar ne? Kıim ne? Balasy ne?
Kópke kıim jetedi ne sebepten?

VI
Kishkentaı, kúreń qyzyl, dóp-dóńgelek,
Tamaqqa ábden toısa, bolady kók.
Qanǵa toıyp alǵan soń qarny úlkeıip,
Úlkendigi ketedi on ese bop.

VII
Bir nárseden úsh sıpat qyldym haıla,
Bul jumbaqty shesherlik adam qaıda?
Bir sıpatyn ortadan kesip alsam,
Ornynda taǵy bolar ekeý paıda.
Bireý dep kesip alyp tastaǵanym,
Úsheý bolyp jatady basqa jaıda.

VIII
Bir de emes, tamam sannyń biri de emes,
Ne úlken, ne kishkene, iri de emes,
Ǵylym tapqan sıpattyń biri onda joq,
Bul jumbaq óli de emes, tiri de emes.

---