Júregim, neni sezesiń,
Senen basqa jan joq pa?
Dúnıeni, kóńilim, kezesiń,
Tıanaq joq pa, qoı, toqta!

Sezgenińdi sezdirip,
Jete almadyń ortaqqa.
Tiri jannan bezdirip,
Aparasyń qaı jaqqa?
Ortaqtyq, tynyshtyq dostyq qoı,
Onyń qadirin kim biler?
Árkimge-aq tileý qostyq qoı,
Bári — aldamshy saýdager.

Halyqtyń aty kerek qoı
Ia maqtaýǵa, boqtaýǵa.
Qubylǵa bári zerek qoı,
Bári jaısyz toqtaýǵa.

Dosty qaıdan tabasyń,
Keńeserge adam joq.
Árli-berli shabasyń,
Jalǵyzdyqtan jaman joq.

Aqyl aıtsań bireýge
İshiń erip, egilip,
Uıalmas aqy tileýge,
Bermeseń qalar túńiliip.

Aqy berip tyndatqan
Sóz kókeıge qonar ma?
Qulaǵyn satqan táńiri atqan
Ońdyrar ma, ońar ma?

Kúıesiń, júrek, kúıesiń,
Kúıgenińnen ne paıda?
Dúnıede neni súıesiń,
Ómir qaıda, dos qaıda?

---