Jıyrma úı meniń kórshim – Qarabatyr...
Jıyrma úı meniń kórshim – Qarabatyr,
Alpys úı, bári kedeı Ánet jatyr.
Nashar ata balasy deıdi olardy,
Eńbekterin bul kúnde umytty aqyr.

Shetinen batyr edi jýantaıaq,
El jaýyn jeńgen janyn aıamaı-aq.
Jýandar paıdalanyp erlik kúshin,
Tuqymyn batyrlardyń qyldy saıaq.

Ánet babam úsh júzge málim bolǵan,
Adaldyqpen basyna baqyt qonǵan.
Jetim qap balalary, kedeı bolyp,
Ádiletsiz zamanda baqty solǵan.

Bákeme qajy eken bólip bergen,
Biledi muny anyq kózi kórgen.
Bákem ólip qalǵan soń jastaıynan,
Ánet pen Qarabatyr maǵan ergen.

Kóp tústim men olardyń daýlaryna,
Naqaqtan bergenim joq jaýlaryna.
Berekesi ketpegen nashar eldi
Túsirmedim qýlardyń aýlaryna.

Olar da shyqpap edi aqylymnan,
Qalmaǵan janyn aıap maqulymnan.
Ádiletsiz isine shydaı almaı,
Arazdasyp aıryldym jaqynymnan.

İni-baýyr tizgindi qoldan alyp,
Tuǵyrdan tústim búgin men qartaıyp.
Berekesin ketirip kedeı eldiń,
Ákimge sorlyny jeý bolmady aıyp.

Zorlyq kórgen molama kúnde kelip,
Jazdyrmaı jazýymdy kóńil bólip.
«Partıaǵa kirisip neń bar?» deıdi,
Olarǵa aıtsam qıanat isin kórip.

Dosyma aıtam: «Qýlardyń tiline erme,
Partıasyna eshkimniń ere kórme.
Noqtaǵa basyńdy ilseń, shyǵa almaısyń,
Birlik buzyp, ketirip, erkiń berme» –

Desem de bári ketti tilimdi almaı,
Aǵaıyn aıtqanyma qulaq salmaı.
Saıtan bılep ketken soń amalym ne,
Qaıteıin japanda ózim jalǵyz qalmaı.

Esh adamdy qaldyrmaı qasyma da,
Ot pen sý, ózim júrem asyma da.
Elsizde jalǵyz jatyp jazý jazam,
Qaramaı taqap qalǵan jasyma da.

Qarabatyr, qoshtastym Ánetpenen,
Tek qana bólek edi janym senen.
Meni endi esepte ólgen shal dep,
Jýandar sanaspaıdy menimenen.

Aqylym – eńbek iste, eginiń sal,
Erinbeı jerdi emseń, tabylar mal.
Partıaǵa salynba birlik buzyp,
Jeliktirse – jelikpe, tilimdi al.

Partıa qýǵan qýlaryń azyp-tozar,
Aramdyqpen ómirdi qansha sozar.
«Baıdyń maly bolady bir borandyq» –
Bárinen adal etken eńbek ozar.

Jasymnan sender ediń meniń elim,
Aıaýshy edim qaıysyp, synyp belim.
Tirligimde tilimdi almasań da,
Ólgennen soń dersińder: «Qamqorshy erim».

Molama, esińe alyp, kelersińder,
Sózimdi oqyp, oılanyp kórersińder.
Aıtqanym tapjylmastaı kelgenine
Kóz jetip, sonda ǵana senersińder


You Might Also Like

Jańalyqtar

Jarnama