Keıbireý bezdi deıdi elden meni...
Keıbireý bezdi deıdi elden meni,
Esalań aıtady eken sezip neni.
Haqıqatty tanıtyn basta mı joq,
Ondaılardyń saý emes anyq deni.

Kóre almas ózimshilder peıili tar,
Jýandyq, zorlyq, kúnshil maqtany bar.
Qasqyrsha jemtik jeýden tartynbaıdy,
Adamshylyq boıynda qalmaǵan ar.

Men jalǵyz, sender elde qoıdyń qalyp,
Eshkimniń ketkenim joq malyn alyp.
Elý bes jyl jınaǵan qazynamdy
Ońashada qorytam oıǵa salyp.

Zorlyǵyn elge istegen basshylardyń,
Aldaǵan aram molda, baqsylardyń,
Jarıalap, jaılaryn jaıyp jurtqa
Qulaǵyna salmaqpyn jaqsylardyń.

Jalmaýdan jalyqpaǵan eldi talap,
Nashardy momyn menen kúnde sabap.
Ósektep meni elge jamandaıdy,
Kórmeıdi arsyz qylyǵyn ózi sanap.

Jetim menen jesirdiń alyp malyn,
Malyn qoıyp, talaıdyń iship qanyn,
Jazyqsyzdan naqaqqa jala jaýyp,
Aıamaı shyrqyratar shybyn janyn.

Kórgen soń el jarasyn anyq sezip,
Ańdaıyn aıdalaǵa kettim kezip,
El emes, elge istegen qylyǵynan
Qashqamyn, shynymdy aıtsam, sonan bezip.

Elsizde nege jalǵyz qalǵanymdy,
Qyryq jyl neni jınap alǵanymdy
Sezbeısiń tartpaǵan soń kóp qaıǵysyn,
Sen emes uǵatuǵyn armanymdy.

Armanym baılyq, mansap, maqtan emes.
Oıly adam ony áste olaı demes.
Ary zor, ata uly emes, adam uly
Itshe talap óz elin, jyrym jemes.

Partıa, aldaý, qýlyq – qylǵan isiń,
Jylmaıy syrtyń taza, aram ishiń.
Saǵan aqyl aıtýdan jalyqqamyn,
Sarp etken bar eńbegim keıingi úshin.

Aıtamyn, sózimdi uqsań, keıingi jas,
Qıanatsyz adamǵa emespin qas.
Júrektegi dertimdi biler ediń,
Ósekke ermeı, menimen bolsań syrlas.

Aramnan adaldy aqtap ala almadym,
Janǵannyń janyn saqtap qala almadym.
El zarlatqan arsyzdyń qylyǵynan,
Janyna janym shoshyp bara almadym.

Eldi sóktim «saıtanǵa eresiń» dep‚
«Nege olarǵa tizginińdi beresiń» dep.
Elertkenge eligip ere berseń,
Eskerttim «azyp-tozyp ólesiń» dep.

Surashy, ne aıttym eken jaqynyma,
Bireýi kóndi me eken aqylyma?
Syrt berip, syrdań tartyp júre berdi
Qystyrmaı aqylymdy taqymyna.

Eti ketip, qaýqıǵan súıegim bar,
Jaı tappaı janyp júrgen júregim bar.
Jaınaǵan taza júrek, talapty jas,
Uǵar degen sózimdi tilegim bar.

Jastarym, jaıym osy, maqtanym joq,
El jegen ákimderdi aqtarym joq.
Ólgenimshe jazýmen eńbek etem,
Qajydym, qartaıdym dep jatqanym joq.


You Might Also Like