Kóshpeli bolǵan jurttyń sharýasy bar
Kóshpeli bolǵan jurttyń sharýasy bar,
Sart, noǵaı jan saqtaıdy saýdasy bar.
Jezquıryq japalaqpen jemtiktes bop,
Suraıtyn bir-birinen saýǵasy bar.
Arasy aǵaıynnyń alys boldy,
Talasyp, damyly joq jarys boldy.
Jetilip partıamen dárejesi,
Jaqsyǵa jaman adam tanys boldy.
Jyrtyldy baıǵa erýmen kedeı tańy,
Kóshinen adastyryp baıdyń shańy.
Kúpildep, úıde otyryp kújildeıdi
Jigittiń qorazdanǵan keıbir pańy.
Jaz bolsa, aýyldasyń yńǵaı qonyp,
«Qyzyq qoı bu júrgen,-dep,-mundaı bolyp».
Ókshesin jyltyratyp kóp kedeıler
Júrse de at pen tonnan jurdaı bolyp;
Bireýdi pana qylyp, súıregensip,
Máz bolyp otyrǵanǵa saýmal iship,
Myrzasy qasyna ergen sol nasharyń
Shyǵynyn soǵan artar syrttan piship.
Basynda bostandyq joq, damyl almaı,
Sapyrylysyp erteńdi-kesh júrgen talmaı,
Tobyndaı qońyr qazdyń ý-shý etip,
Attanar, kóteriler biri qalmaı.
Muratqa bir jetedi tas salǵanda,
Bı, bolys, aýylnaı bop basqarǵanda.
Shyǵyny partıanyń sýǵa aqqandaı,
Talasyp, sannan kemip tas qalǵanda.
Jalańdap ajdahadaı aýylnaılar,
Beline aq kıizden kúıek baılar.
Sıpyryn bes tıynnyń bes teńge dep,
Kedeıler hat bilmegen sory qaınar.
Moınyna sary jezden qarǵy salyp,
Aldyna neshe túrli daý-shar baryp,
Jıylyp qara qustaı bıler otyr
Jemtigin ólekseniń qorshap alyp.
Osylaı aram tamaq jegen bári,
Saqtanbas obal ǵoı dep jetken áli.
Jalyqpas aıta bersem, tolyp jatyr
Bylaısha zamanada jurttyń hali.


You Might Also Like