InfoHub Logo

Bul jattyǵýlar sharshaǵandy basyp, kóz qyraǵylyǵyn jaqsartyp, adamnyń rahattanýyna ákeledi. Siz olardy úıde de, jumysta da isteı alasyz: nebary birneshe mınýt ýaqyt bólip, tynysh bir bólme tapsańyz jeterlik. Eń bastysy, bul jattyǵýlardy kún saıyn jasaý qajettiligin umytpańyz.

Barlyq jattyǵýlardy arqańyzdy túzý ustap otyryp isteý qajet. Árbir jattyǵýdy bitirgennen keıin, kózińizdi jaýyp, birneshe sekýnd dem alý qajet.

1-jattyǵý

Kózińizdi jabyńyz da, deneńizdi bos ustaı alý maqsatynda birneshe ret tereń tynys alyńyz. Endi eki alaqanyńyzdy ýqalap, kózderińizge basyńyz. Qoldaryńyz óz jylýyn tolyǵymen bermeıinshe, osy qalypta qalýǵa tyrysyńyz. Endi kózderińizdi ashpaı, alaqandaryńyzdy taǵy bir márte ýqalap, qaıta kózderińizge basyńyz. Jattyǵýdy úsh ret qaıtalańyz.

2-jattyǵý

Kózińizdi ashyńyz da tez-tez 10 ret kózińizdi ashyp jabyńyz. Endi kózderińizdi jaýyp, deneńizdi bos ustap, tynysyńyzdy tyńdańyz. Jattyǵýdy 5 ret qaıtalańyz.

3-jattyǵý

Judyryqtaryńyzdy túıip, bas barmaqtaryńyzdy joǵary kóterińiz. Qoldaryńyzdy kózderińizdiń deńgeıine deıin kóterińiz. Eki qasyńyzdyń arasyndaǵy keńistikke qarap, nazaryńyzdy sol qolyńyzdyń bas barmaǵyna aýdaryńyz. Taǵy da eki qasyńyzdyń arasyndaǵy keńistikke qarap, nazaryńyzdy oń qolyńyzdyń bas barmaǵyna aýdaryńyz.
Eki qas arasyna qaraǵan kezde, tynys alyp, saýsaqtaryńyzǵa qaraǵan sátte demińizdi shyǵaryńyz. Jattyǵýdy 10-20 ret qaıtalaý qajet.

4-jattyǵý

Qoldaryńyzdy tizelerińizge qoıyp, basyńyzdy túzý ustańyz. Aldyńyzdaǵy bir núktege qarańyz. Demińizdi shyǵara otyryp, sol qolyńyzdyń bas barmaǵyna nazar aýdaryńyz. Tynys alǵan kezde taǵy da aldyńyzdaǵy núktege qarańyz. Týra osy jattyǵýdy oń qolyńyzdyń bas barmaǵymen jasańyz.

5-jattyǵý

Sol qolyńyzdy bos qalpynda tizeńizde ustańyz. Judyryqqa túıilgen jáne bas barmaǵy joǵary kóterilgen oń qolyńyzdy alǵa qaraı sozyńyz. Saǵat tilshesi boıymen jáne saǵat tilshesine qarama-qarsy baǵytta qolyńyzdy bes ret sermeńiz. Kózińizben bas barmaǵyńyzǵa qarap otyrý qajet. Qolyńyzdy joǵary qaraı kótergende, dem alyp, tómen túsirgen kezde, demińizdi shyǵaryńyz. Jattyǵýdy sol qolyńyzben qaıtalańyz.

6-jattyǵý

Qoldaryńyzdy tizelerińizge qoıyńyz (judyryqtaryńyzdy túıip, bas barmaqtaryńyzdy joǵary kóterińiz). Dem ala otyryp, oń qolyńyzdy birtindep kóterý qajet. Kózińizdi bas barmaǵyńyzdan aıyrmaısyz. Qolyńyzdy búkpeısiz, basyńyzdy qozǵaltpaısyz. Saýsaǵyńyz kórinis aıasynyń eń joǵarǵy núktesine kelip jetkende, birtindep demińizdi shyǵaryp, kózińizdi bas barmaǵyńyzdan aıyrmastan, qolyńyzdy túsire bastaısyz. Bul jattyǵýdy ár qolyńyz úshin 5 retten jasaǵan abzal.

7-jattyǵý

Oń qolyńyzdy alǵa qaraı sozyp, judyryǵyńyzdy túıip, bas barmaǵyńyzdy joǵary kóterińiz. Saýsaǵyńyzdyń ushynan nazaryńyzdy almaısyz. Dem ala otyryp, qolyńyzdy birtindep murnyńyzǵa jaqyndata túsińiz.

Saýsaǵyńyzdy murnyńyzdyń ushyna tıgizip, dem almaı, birneshe sekýnd otyrý qajet. Endi demińizdi shyǵaryp, qolyńyzdy bastapqy pozısıaǵa qaıtarasyz. Jattyǵý barysynda nazaryńyzdy saýsaǵyńyzdyń ushynan almaısyz. Jattyǵýdy 5 ret qaıtalaý qajet.

8-jattyǵý.

Alystaǵy bir núkteni tańdap alyńyz ne bolmasa terezeniń aldyna otyryp, kókjıekke kóz tigińiz. Endi nazaryńyzdy murnyńyzdyń ushyna aýdaryp, 5-10 sekýnd boıy osy kúıde otyrý qajet. Jaqyn núktege qarap, dem alasyz, alys núktege qarap, demińizdi shyǵarasyz. Jattyǵýdy 10-20 ret qaıtalap shyǵyńyz.

Eger bul jattyǵýdy úıde oryndasańyz, aıaǵyńyzdy sozyp, birneshe mınýt boıy jata turyńyz.

Eger Siz kún saıyn kompúter aldynda uzaq otyrsańyz, onda kózge arnalǵan gımnastıkany kún saıyn isteýińiz qajet. Kózge arnalǵan jattyǵýlar kompleksin jasaýdy umytpaý úshin Eyexercise servısin qoldanýdy usynamyz. Ol ár saǵat basynda shaǵyn úzilis jasap, kózge arnalǵan birneshe jattyǵý isteý qajettiligin esińizge salyp turady. Google Chrome-nyń «Otdyh dlá glaz» atty baǵdarlamasy da osy sıpatta jumys isteıdi. Ol jumys barysyndaǵy úzilister uzaqtyǵy men olardyń arasyndaǵy ıntervaldy aldyn ala josparlaý múmkindigin beredi.

Bul jattyǵýlardy oryndaýda tek bir ǵana núans bar ekenin aıta keteıik: eger kózińizben baılanysty problemalaryńyz (glaýkoma, katarakta, kózdiń ishki tor qabyǵymen baılanysty aýrýlar) bolsa, kózge arnalǵan kez kelgen jattyǵýdy oryndamas buryn, dárigermen keńesý qajet.

---