Mal jımaq
Maqtan úshin mal jıma, jan úshin jı,
Qazaqqa kóz súzbestiń qamy úshin jı.
Aryń satpa, teriń sat, alaldy izde,
Ǵıbadat pen adaldyq, ar úshin jı.

Erinbeseń eńbekke, dáýlet daıyn,
Jaratqan joq jatsyn dep bir qudaıyń.
Oılasyn dep oı berdi, kórýge kóz,
Aıaq berdi, tapsyn dep basqan saıyn.

Úıde otyryp salǵanmen sary ýaıym,
Tilegeniń tura ma saǵan daıyn.
Júrip-turyp, oılanyp istep kórseń,
Harekettiń bilesiń sońda jaıyn.

Jatyp ishken – jan tynysh, salǵyrt-salaq,
Oǵan aram – hareket, oı oılamaq.
İzdemegen kisige qaıdan kelsin
Taza kıim, jyly oryn, tátti tamaq.

Egin sal, ne saýda qyl, malyńdy baq,
Bilim bilmek – ár iske sheber bolmaq.
Qol ónerden paıda qyl úırenip-aq,
Ketpes dáýlet osy ǵoı Qudaıǵa haq.

Qol óner óziń ólseń birge óledi,
Sonda-daǵy qalǵandar úırenedi.
Sen ketseń de óneriń elde qalyp,
Talaı janǵa azyq pen mal beredi.

Ári ermek, ári paıda, ári durys,
Demeıdi qol ónerdi eshkim burys.
Kóringenge kóz satyp jalynǵansha,
Kúndik ómir qalsa da soǵan tyrys.

Dep oılama buıryqsyz dáýlet qaıda,
Jalyqpaı talap etseń – daıyn paıda.
Adal qol ashtan ólmes, qury qalmas,
«Júrgen alar» degen ǵoı bir Qudaı da.

Talappen adal isti istemekpiz,
Tapsyrdyq bir Allaǵa biz demekpiz.
Yndynyń taza bolsa, ımenbeńiz,
Dáýletti osylaısha izdemekpiz.

Qudaıdan aram isti tilemek joq,
Úıtseń tıer keýdeńe bir jaman shoq.
Uıalmaı Qudaı atyn ataımysyń,
Nápsińe erip jep jatyp bir aram boq.

Qudaı taza jaratty, sen taza bol,
Uqsań, anyq aıttym ǵoı, bul – týra jol.
Maqtan kúılep, aramnan mal jınasań,
Ornyń – dozaq, sorly, sen, aıtqanym sol.


You Might Also Like

Jańalyqtar

Jarnama