Ashylǵan kóz tura ma bir zat kórmeı,
Mıǵa habar bermeı me túsi ózgermeı.
Ádeıilep kóreıin demeseń de,
Qarsy aldyńa qoıa ma túk kez kelmeı?
Sol syqyldy kóńildiń kózi ashylsa,
Kóp oılanyp, qıynǵa sermeı-sermeı.
Biler, aıtar, oıatar, jybyrshytar,
Erkińdi alar, sóıleter tynym bermeı.
Oıdan marjan, merýert tógilgende,
Otyra alar kim shydap ony termeı.
Daǵdy qylsań, dap-daıyn istiń bári,
Adamzat tura almaıdy ádetke ermeı.
Bal ashqan soń op-ońaı baqsy bolmaq,
Ol qoıa ma ǵaıyptan habar bermeı.
Toqty soıyp dándegen toqtaı almas,
Jylqy urlaǵysh batyr bop o da elermeı.
Bir rúmkadan bastalar maskúnemdik,
Nasha ústinen nashaǵa órleı-órleı.
Oılasań, sonyń bári – bir qumarlyq
Qýa bermeı qaıtedi tepshı-terleı.
Azdan keıin arany ashylady,
Qaza berse, taýsylmas shyqqan kendeı.
Jerdiń júzin qylarsyń bir-aq ýys,
Bárinen de ózińniń keýdeń keńdeı.
Jyn da – jyn, qumar da – jyn, mastyq ta – jyn,
Óleń de – jyn, qoıa ma boıdy jeńbeı?
Shyn qumar shymyrlatpaı qoımas, sirá,
Ár jerge soqtyqtyrar aqqan seńdeı.
Árıne, bir qumarcyz ómir qarań,
Ondaı jannyń tura almas oty sónbeı.
Súıtse de ıfrat bar, tafrıt bar1,
Jaraı ma sony aıyryp rettemeı.
Ne qylsań, qyl adamǵa mahabbat dep,
Meıliń sók, meıliń úıret, aıla izdenbeı.
Ol súıýiń shyn bolsyn, jalǵan emes,
Buldyr bolma ózińe-óziń senbeı.
Dúnıequmar, zalalkes bola qalsań,
Ólimdi oıla kelerlik kúni erteńdeı.
«Maǵan súıtse, qaıter em?» dep oılashy,
Adamnyń balasy ǵoı o da sendeı.
Shyraqtar, eń qumaryń osy bolsyn
«Alla súıseń, adamdy súı» degendeı.
Qumaryń bir, isiń kóp bolsyn, janym,
Kópke qumar, erinshek bolma mendeı.
«Moldanyń isin qylma, aıtqanyn qyl»,
Erte saqtan ár iske ádettenbeı.
Qapy qalsań, qaıta oqyp, taǵy da oıla,
Dep júrme: «Sóziń qaldy ishime enbeı».
Oı qumar, óleń qumar, malǵa qumar –
Bul úsh qumar qoıa ma meni kómbeı.
Qaırat qaıtsa, amalsyz bári qaıtar,
Qaıran oı qartaıady-aý ózim ólmeı.
Ermegim joq, ólimnen úmitim joq,
Qaıteıin osyndaımen kóńil bólmeı.

---