InfoHub Logo

Atyraý oblysynyń ákimi Nurlan Noǵaev jeti han jatqan Saraıshyqqa úıindi dep qaraýǵa bolmaıtynyn aıtty. Bul týraly aımaq basshysynyń “Qazaqstan” Ulttyq arnasyndaǵy “Basty taqyryp” baǵdarlamasyna bergen keshegi suhbatynda belgili boldy.

Saraıshyqty saqtap qalý múmkin be degen saýalǵa oblys ákimi saqtap qalý qajet ekenin aıtyp jaýap berdi.

– Saraıshyqta, bireý biler, bireý bilmes, mamandardyń aıtýynsha, qazaqtyń jeti hany jerlengen. ...Bul ne úshin kerek bizge? Siz aıtqandaı bosqa ýaqyt ótkizip jatqan joqpyz ba? Bul jatqan topyraq úıindileri ǵoı. Sony qazbalaı berip ne qylymyz, qarajat jumsap ne qylamyz degendeı. Biraq, halyq aıtqandaı, ótkendi bilmeı, bolashaq bolmaıdy. ...Saraıshyqty saqtaý kerek, – dedi ol.

Aıta ketelik, byltyr Atyraý oblysynyń ákimdigi 1,5 mıllıard teńge qarastyryp, kóne shahardy shaıyp bara jatqan Jaıyq ózeniniń jaǵasyn bekitýdi bastady. Sonymen qatar, Mádenıet jáne sport mınıstrligi ejelgi qalany qalpyna keltirý úshin taǵy 100 mıllıon teńge bóletinin málimdedi. Saraıshyq qalasyn týrısik ortalyqqa aınaldyrý úshin kásipkerlerdi tartý josparlanyp otyr.

Kóne shahar Atyraý qalasynan 45 shaqyrym jerde Jaıyq ózeniniń jaǵasynda ornalasqan. Altyn ordanyń saıası, ekonomıkalyq ortalyqtarynyń biri bolǵan qala Qasym hannyń tusynda Qazaq handyǵynyń astanasy atandy. Jibek jolynyń boıynda turǵan munda 7 han jerlengen. Olar: Móńke, Toqtaǵý, Jánibek, Ámir Oqas, Qasym han, Shıh Mamaı jáne Júsip handar.

---