InfoHub Logo

Bul sabaq týraly men erekshe tolǵanyspen aıtqym keledi. Sebebi, bul sabaq qazaqtyń birtýar uly, balýan Qajymuqan Muńaıtpasov týraly bolatyn. Aldymen sabaqtyń maqsatyn aıqyndap aldym jáne taqyrypqa saı keletin strategıalardy izdestirdim. Maǵan mátindi óz máninde oqýshyǵa jetkize alýym úshin «BBÚ», «Esse», «Galereıaǵa saıahat» jáne topta, jupta talqylaý ádisteri kómektesti. Ásirese, «Maǵynany taný» kezeńinde oqýshylardan Qajymuqan týraly ne biletinderi suralǵanda olardyń tek Qajymuqannyń atyn estigenderi men balýan ekendigin biletinderinen basqa aqparattary bolmady. Bul meni qatty oılandyrdy. Al, kerisinshe, «Bilgim keledi» bóliminde oqýshylardyń kóp bilýge degen qushtarlyqtaryn baıqadym. Olar san alýan suraqtaryn jaýdyryp, árqaısysyna jaýap berýge týra keldi. Sol maqsatta men synypty toptarǵa bólip, mátindi jupta, topta oqyp, taldaýdy usyndym. Oqýshylar qulshynyspen taldap, bólimder boıynsha mazmunǵa saı taqyryp qoıdy.

Degenmen taqyryp tańdaý ońaı bolǵan joq, sebebi, usynylǵan birneshe taqyryptyń ishinen bólimge saı keletinin alý úshin oqýshy berilgen mátin mazmunyn tolyq bilýi jáne mátindegi negizgi oıdy anyqtaı alýy kerek edi. Men osyndaı sátterde olarǵa baǵyttaýshy, nusqaýshy suraqtar qoıyp, negizgi tujyrymdy ózderine jasatýǵa tyrystym. Ár top mazmundap, tıisti suraqtarǵa jaýap berdi. Budan basqa oqýshylardyń bilimin keńeıtý úshin Qajymuqan týraly fılm kórsetildi. Oqýshylar fılmdi zor yqylaspen tamashalap kórdi. Fılmnen keıin oqýshylar alǵan áserlerin bólise otyryp, «Úırendim» baǵanyn toltyrdy. Osy arqyly oqýshylardyń búgingi sabaqtan qanshalyqty bilim alǵany kórinip turdy. «Oı tolǵanys» kezeńinde sabaqtan alǵan bilimderi men fılm boıynsha alǵan áserlerinen esse jazdy. Búgingi ómirmen baılanystyrý maqsatynda ınteraktıvti taqtadan Astana qalasyndaǵy sport keshenin, Qajymuqan atamyzdyń eskertkishin, ol kisiniń atyndaǵy aýyl men kóshe sýretterin kórsettim.
Jalpy, bul sabaqta oqýshylardyń belsendilikteri basym boldy, óz oılaryn búkpesiz aıtyp, syn aıtqandarǵa óz pikirin dáleldeı alýy meni qýantty. Aldaǵy ýaqytta este bolatyn nárse oqýshylardy belgili bir tapsyrmany oryndaýǵa berilgen ýaqytqa úlgerýge úıretý, sonymen qatar keıbir belsendi emes, top atynan sóıleýge táýekel ete almaǵan oqýshylarǵa erekshe nazar aýdarý qajet dep túıdim.