Ózime
Qolda qalam, kózde jas, tolqyndap oı,
Shimirkenip, titirep, salqyndap boı,
Tozǵan mola syqyldy sum kórinip,
Ótken kúnde qyzyqqan saýyq pen toı.

Qanyń qashyp, jasaýrap eki kóziń,
Ne boldym dep tabalap ózińdi-óziń.
Ótken is oıǵa túsip uıaltady,
Qısynsyzdy qyzyq dep qýǵan keziń.

Jáne oıyńa kelgende aldyńǵy jaq,
Sum júregiń ketedi qozǵalyp-aq.
Artyń anaý, aldyń sý, kóz jetpeıdi,
Ótetuǵyn qamyńdy oılanyp baq.

Neńdi aıaısyń, otyrsyń kimdi qımaı,
Qutyrdyń ǵoı táýir-aq jerge syımaı.
Salyp-salyp sandalyp otyrmysyń,
Joq, ózińe az nápsińdi erte tyımaı!

Dosyń qaısy, qımastaı eliń qaısy?
El salmaǵyn kóterer beliń qaısy?
Aýzyń temir tatıdy bárin tatyp,
Jalǵandy qımaıtuǵyn jeriń qaısy?

Dúnıe tur qalybynda – sen ózgerdiń,
Bárin kórdiń, túbine kóz jiberdiń.
Eshkimnen kóretuǵyn dáneme joq,
Ózińdi-óziń ólimge ustap berdiń.

Paıdasyz ben baıansyz qýǵan isiń,
Túpsizdi toltyram dep ketti kúshiń.
Entelegen eńbektiń bári janbaı,
Aq ólimdi shaqyrdyń, sol – shyn dosyń.

Endi qaıtyp sen myqty bola almassyń,
Jas kúndegi tuǵyrǵa qona almassyń.
Keıin baspaı, entelep ilgeri bas,
K... aınalsań, esh jerde ońalmassyń.

Qudaıdan jarylqa dep járdem sura,
Sen talaıdy qyldyń ǵoı bile tura.
Aıaǵyńdy ańdap bas – ólim taıaý,
Qarsy aldyńda daıyn tur qazǵan ura.

Sony oıla, ózge qyzyq isti oılama,
Bireýge aıla, bireýge kúshti oılama.
Ketken qaıta kelmeıdi keıiseń de,
Túnde kórgen kóleńke tústi oılama.


You Might Also Like

Jańalyqtar

Jarnama