Paıǵambar Musa jolyqsa...
Paıǵambar Musa jolyqsa,
Sóılesip kóńilim ornyqsa:
«Adasty jebireı,– der edim,–
Táýratty qaıta tolyqta!»

Dáýitti kórsem, án salyp,
Qýanar edim qarsy alyp:
«Aqynda qaldy ımanyń,
Taǵy úıret,– der em,– bir baryp».

Zardóshke aıtsam kezi kep:
«Úırettiń aqyl nur ǵoı dep.
Uǵa almaı otqa shoqynyp,
Buzyldy eliń boǵyn jep».

Býddanyń ustap bilegin,
Aıyrylmaı birge júremin:
«Jádigóı, baqsy, lamaǵa,
Shoqyndy eliń, bilemin».

Aısany kórsem eger men:
«Tiril,– der edim,– qaıta sen.
Seni qudaı dedi de,
Aıyryldy halqyń dininen».

Muhammetti kóre alsam,
Sóz aıtyp, jaýap bere alsam:
«Adasty molda,– der edim,–
Quranyńdy úıret, kele alsań».

Bul kúnde durys ıman joq,
Shataq din nápsi tyıǵan joq.
Aqyly saýdyń oıyna,
Aldamshy dinder syıǵan joq.

Anyqty eshkim tapqan joq,
Izdemeı qarap jatqan joq.
Álimdi zalym qylatyn,
Shataq dindeı qaqpan joq.

Aqyl da bezdi olardan,
Iz qarap júr sonardan.
Baıqamaı kóbi adasty,
Kóńilge biraq sol arman.

Kórmedi synap dúnıe isin,
Bilmedi qudiret kıesin.
Denege jandy jeńgizip,
Taba almaı qoıdy Iesin.

Zatshyldyq kózin baılady,
Adastyryp aıdady.
Jan bılemeı, tán bılep,
Aqyldyń sory qaınady.

Ǵylym dep ýdy jegizdi,
Denesiz zat joq degizdi.
Dálelsiz pánmen perdelep,
Tapqyzbaı qoıdy negizdi.


You Might Also Like