Jer júzi jabylǵanda ǵylym jaqqa,
Qazaq júr qumarlanyp qur shataqqa.
«Anaý – qý, mynaý – pysyq, men – batyr» – dep,
Aınaldy birin-biri qurytpaqqa.

Oıda joq: «Óner bilip, jol tabaıyn»,
Jalmaýǵa jalyqpaıdy óz mańaıyn.
Munyń túbi ne bolar degen jan joq,
Urlyq, urys, arazdyq kúnde daıyn.

Ótirikpen ótkizip kún men aıyn,
Demeıdi «jamandyqtan jalyǵaıyn».
«Anaý – shynym, mynaýym – syrym ǵoı» –dep,
Sonsha jaqsy biledi aldaý jaıyn.

Jaz jalymen jibermeı jalǵyz taıyn,
Tynyshtyqpen ishkizbeı taqta shaıyn,
Urysy urlap, qýy aldap, sumy elertip,
Qurytady úsh jaqtap tamam baıyn.

Baıdyń da oılaǵany – «el alaıyn»,
Bilmeıdi, qý shaǵyp júr óz baqaıyn,
Kózi aspanda, kóńili maqtanda bop,
Taýysqanyn sezbeıdi ishki maıyn.

Demeıdi «ǵylym bilip jandanaıyn»,
Maqsuty – «maqtan izdep pańdanaıyn».
Qansha uqtyryp aıtsań da – qalybynda,
Oıda joq – «jigerlenip, qamdanaıyn».

Minekı, estiseńiz eldiń jaıyn,
K...inen keıin ketti basqan saıyn.
Qaıran elim, qazaǵym, qaıran jurtym,
Kóp aıtyp, a, darıǵa, ne qylaıyn!

---