InfoHub Logo

Ál-Farabı atyndaǵy Qazaq Ulttyq ýnıversıteti Bıologıalyq qaýipsizdik problemalarynyń ǵylymı-zertteý ınstıtýtymen (BQPǴZI) birlese otyryp, vırýsolog mamandardy daıarlaıtyn bolady.

Ulttyq joǵary oqý ornynyń rektory J.Túımebaev pen Bıologıalyq qaýipsizdik problemalary ǴZI bas dırektory K. Zakará tıisti kelisimge qol qoıdy. Qazir QazUÝ ǵylymı-zertteý ınstıtýtymen birlesip, vırýsologıa salasynda jańa bilim berý baǵdarlamasyn ázirledi.

«Alǵash ret ál-Farabı atyndaǵy Qazaq ulttyq ýnıversıteti Bıologıalyq qaýipsizdik problemalarynyń ǵylymı-zertteý ınstıtýtymen birlesip, vırýsolog mamandardy daıarlaıtyn bolady. Atalǵan baǵytta buryn-sońdy bakalavrıattyń uqsas bilim berý baǵdarlamalary boıynsha oqyǵan joǵary oqý oryndarynyń túlekteri oqı alady. Olar QazUÝ bıologıa jáne bıotehnologıa fakúltetiniń bazasynda ári BQPǴZI BSL-2 jáne BSL-3 zerthanalarynda bilim alatyn bolady. Vırýsologtardy daıarlaý kezinde stýdentterdiń teorıalyq qana emes, praktıkalyq bilim alýyna basty nazar aýdarylady. Jetekshi vırýsologtar zertteý men dıagnostıkany qalaı júrgizý qajet, vırýstyń jańa túrlerin qalaı anyqtaý kerektigin kórsetip, óz tájirıbelerimen bólisedi. Sondaı-aq bilim alýshylar molekýlárlyq bıologıa, bıohımıa, mıkrobıologıa ádisterin meńgeredi», — dedi Bilim jáne ǵylym vıse-mınıstri Qýanysh Erǵalıev.

Praktıkalyq sabaqtar basym bolǵandyqtan, stýdentter BQPǴZI bazasynda tájirıbe jáne taǵylymdamadan ótedi. Instıtýt ǵalymdary, sonyń ishinde koronavırýsqa qarsy vaksına jasaǵan ǵalymdar vırýsologıa, bıologıa jáne bıotehnologıa salasynda praktıkalyq sabaqtar men semınarlar ótkizedi. Oqýdy úzdik aıaqtaǵan túlekter odan ári bıologıalyq qaýipsizdik problemalary ǵylymı-zertteý ınstıtýtyna jumysqa ornalasýy múmkin.

Aldaǵy ýaqytta ǵylymı-zertteý ınstıtýty bazasynda doktorlyq jumystardy qorǵaý jónindegi dısertasıalyq keńes qurylatyn bolady. Ǵylymı-zertteý jumystaryn júrgizý kezinde ádistemelik-konsýltasıalyq kómek kórsetý úshin sheteldik ǵalymdardy tartý kózdelip otyr.

Bıologıalyq qaýipsizdik problemalarynyń ǵylymı-zertteý ınstıtýty mamandarynyń bıologıalyq qaýipsizdik, bıotehnologıa, vırýsologıa, mıkrobıologıa, ımmýnologıa salasynda mol tájirıbesi bar ekenin atap ótken jón. Instıtýt ǵalymdary preparattardyń 60-tan astam ataýyn, onyń ishinde 30 vaksına, 16 test-júıe jáne 15-ten astam túrli bıopreparattardy ázirlep, engizdi. Sońǵy 10 jylda ınstıtýt asa qaýipti ınfeksıalarǵa qarsy vaksınalardy, onyń ishinde otandyq QazVac vaksınasyn daıyndaý tehnologıasyn jasady.

---