Bir qorqaq baı bilmeıdi Qudaıdy bir,
Kóringenge jalynyp jalpyldap júr.
«Qastyǵynan qutyldym báriniń» dep,
Malyn jaldap kún kórdi sonymen qur.

Ury-qary, myqtynyń bári – baıy,
Olarǵa kúnde daıyn et pen shaıy.
Áli jetken kisin o da jeıdi,
Qolynan is kelgende solaı jaıy.

Oılasań, kóp bul eldiń osyndaıy,
Shoqynǵany – dáýleti, qoı men taıy.
Qorqamyn dep adamnan Qudaı jasap,
Oıynda joq jaratqan bir Qudaıy.

«Aransyzbyn,– demeıdi,– aqtan ólip»,
Janyn qorǵap qalady qýǵa kónip.
Muny qalaı musylman deı alamyz,
Bir Qudaıdan basqaǵa júrse senip.

Qutylsyn-aq tar jerde malyn jaldap,
Aıla qylmaq adal ǵoı jandy qarmap.
«Aramǵa bas» dese de, ańqyldaıdy,
«Qoryqtym» degen bola ma Qudaıdy aldap.

Birádársip otyrar «A, Qudaılap»,
Paıdasy úshin aılanyń bárin saılap.
Urydan qoryqqanyn syltaý qylyp,
Tý bıesin alady atyn maılap.

Ury berse bir jylqy alasy úshin,
«Bireý bilse, tússin,– dep,– sizben isim»,
K...ińe tyq, ne qylsań kózin joǵalt,
Al endi tazamysyń, urymysyń.

Iesin bilseń-daǵy aıta almaısyń,
Ury men myqty kórseń, qaıqańdaısyń.
Beısharasyp, beıqamsyp aldaıtuǵyn,
Beıne sen de jádigóı saıtandaısyń.

Bir myqtynyń ustaısyń endi etegin,
Qaıda aparsa, sol bıler kósh jetegin.
«Pálensheniń ústinen aryz ber» dep,
Bir momynǵa soqtyqtyń tekten-tegin.

Nemese kýá boldyń aram iske,
Tóbelesse, kiristiń zorlyq kúshke.
Qudaıdy bar demediń, adam – Qudaı,
Táńiriń yrza boldy ma bul júriske.

Jýanǵa jylpyldaısyń «jaǵamyn» dep,
«Ne qylsam da jaqyn bop baǵamyn» dep.
Bastap júrgen baıynyń basy aýyrsa,
Umtylar «ókpem alyp qaǵamyn» dep.

İshinen shyn dos emes, jek kóredi,
«Osynyń zorlyǵy-aı!» dep kektenedi.
Malyn berip alady basyn satyp,
Myqtynyń zıanynan sektenedi.

«Táýekel qyl» degendi unamaıdy,
Tym bolmasa, bir joly synamaıdy.
«Aq isime Qudaıym jaq bolar» dep,
Allaǵa súıenýge shydamaıdy.

Baıǵus-aý, osymenen ketkeniń be,
«Qorqamyn» dep túbińe jetkeniń be.
Qıt etkende qylpyldap tynym tappaı,
Ómirińde jaltaqtap ótkeniń be?!

«Oǵan barma, maǵan kel» demeımin men,
Oılanyp, óz isińnen óziń jıren.
Búıte berseń seniń de ornyń jaman,
Ońar qylyq bul emes, sózime sen.

---