InfoHub Logo

Bir kúni Juqa sıyryn satpaq bolyp bazarǵa barypty. Biraq kópke deıin eshkim kelip onyń baǵasyn suramapty. Sol aralyqta bir dosy jolyǵyp:

— Juqa, sıyryńdy áli sata almadyń ba? — dep surapty.

— Ia, tańerteńnen qazirge deıin sıyrym ondaı jaqsy, mundaı jaqsy dep maqtap-aq jatyrmyn, biraq alýshy shyqpaı tur, — depti Juqa.

— Oqasy joq, men satysyp bereıin, beri kel, — depti álgi dosy.

Dosy Juqanyń sıyryn jetektegen boıda jurt quramy molyraq jerge baryp birneshe aınalyp shyǵyp:

— Oı, myna sıyrdy kim alady? Tisi jas, tomsa býaz, býaz bolǵanyna alty aı boldy, — dep aıǵaı salypty. Ol osylaısha aıǵaılaǵannan keıin alarmandar jabyrlap kele bastaıdy. Bireýi tipti alamyn dep aqshasyn da ustatady. Bul aqsha Juqanyń mejesinen kóp bolyp shyǵady. Juqa aqshasyn alyp, dosyna rahmet aıtyp máz-meıram bola úıine qaıtady. Birneshe kúnnen keıin Juqanyń úıine birneshe áıel kelip onyń qyzyna
qudalyq sóılespek bolady. Áıeli Juqaǵa:

— Shaleke, sen úıden shyǵa tursań, men áıelderdiń janynda bolyp qyzymyzdy maqtap bereıin, qyzymyzdy kórsetip olardy razy eteıin, sóıtip, olardy kóńildegideı jaqsy kúıeý tabatyn eteıin, — depti.

— Sen qoıa ǵoı, eki sózdiń basyn qurap aıta almaıtyn keshsheniń ózisiń. Olarmen meniń sóıleskenim ońdy. Ótpeıtin buıymdy ótkizýdiń bir jaqsy ádisin úırenip alǵam. Sol ádis boıynsha sóılesem, qyzymyzdy alamyn deýshiler bosaǵamyzdy tozdyratyn bolady.

Juqanyń áıeli buǵan nanyp maqul bolypty. Sonan soń qudaǵı bola kelgenderdiń janyna baryp qyzyn shaqyryp, olarmen bet kóristiripti de:

— Qymbatty meımandar, az aıal qyla turyńyzdar, qyzdyń ákesiniń birneshe aýyz sózi bar eken, — depti.

Juqanyń áıeli Juqany shaqyrady. Juqa jaýshylarǵa qarap:

— Qymbatty jeńgeıler, qyzym týraly kópirtip kóp sóılegim kelmeı tur, aıtatyn eki aýyz sózim bar, sonyń ózi de jetkilikti bolar, meniń qyzym shynynda jaqsy qyz, onyń qursaq kótergenine alty aı boldy, — depti.

Jaýshyǵa kelgen áıelder Juqanyń sózin estigennen keıin, bir-birine kóz ısharatyn qylady da, lám-mım demeı úıden shyǵyp kete barady.

---