InfoHub Logo

2023 jyldyń qarasha aıynda Reseı prezıdenti Vladımır Pýtın Toqaevtyń shaqyrýymen Astanaǵa resmı saparmen keldi. Qazaqstannyń ońtústik úsh oblysyna, atap aıtqanda Túrkistan, Qyzylorda, Jambyl oblystarynda orys tilin tereńdetip oqytatyn qazaq-orys mektepterin ashý týraly usynys osy sapardan keıin aıtyldy.

Reseı premer-mınıstriniń orynbasary Alekseı Overchýk Qazaqstandaǵy mektep ashý týraly oıyn aıtyp:«Qazir biz Qazaqstannyń ońtústiginde orys tilinde oqytatyn úsh mektep salý máselesin talqylaýdy bastadyq», - degen bolatyn Qazaqstan Respýblıkasy men Reseı Federasıasy arasyndaǵy shekaralyq yntymaqtastyqtyń 19-shy óńiraralyq forýmynda.

Ol sondaı-aq Qazaqstan Prezıdenti Qasym-Jomart Toqaevqa orys tili jónindegi halyqaralyq uıym qurǵany úshin alǵys aıtqan bolatyn.

Bilim mınıstri Ǵ.Beısembaevtyń oıynsha ońtústik óńirdegi mektep tapshylyǵy máselesimen osylaı kúrespek eken.

«Qazaqstannyń ońtústiginde úsh aýysymda oqıtyn mektepter kóp. Bul úlken oblys, sondyqtan, árıne, ol jaqta mektep salýǵa qoldaý kórsetýimiz kerek. Negizinde bizde (Qazaqstanda – red. eskertpesi) aralas mektepter nemese orys tilinde oqytatyn mektepter bar», - dedi mınıstr Ǵanı Beısembaev.

Mektepter kimniń esebinen salynady? Mınıstrdiń aıtýynsha, Qazaqstan orys mektepteri Reseı búdjeti esebinen salynady. Qurylystyń quny ázirge eshkimge belgisiz.

Sońǵy kúnderi áleýmettik jeli qoldanýshylary bul máselege jappaı qarsylyǵyn bildirip jatyr.

infohub.kz