Serigim – jalǵyz áýpish qasymdaǵy
«Serigim – jalǵyz Áýpish qasymdaǵy,
Erteden joldasymsyń jasymdaǵy.
Taza júrek, oıyńda aramdyq joq,
Qaıǵymdy sen uǵasyń basymdaǵy.

Neshe jyl birge jattyń menimenen,
Oılasam, erkińdi men aldym negen?
Elge bar, ruhsat berdim yrzalyqpen,
Qosh, Áýpish! Aırylysam senimenen».

Ol aıtty: «Ketem degen oıymda joq,
Kıim bútin, qaıǵysyz, tamaǵym toq.
Birge júrip, bir jýsap, úıir boldym.
Aırylsam, júregimde janbaı ma shoq».

«Adalsyń, júregińdi aıtpaı bilem,
Elsizde endi jalǵyz ózim júrem.
Adam erkin baılaýdy ar súımedi,
Ólgenshe eńbek etip, ómir súrem».

Minezimdi biletin adal joldas
Aıtqanyma «qup» dedi, burmady bas.
Attandyryp salarda amandasyp,
Eriksiz shyǵyp ketti kózimnen jas.

Onyń joq tileginiń alalyǵy,
Menimen birge ótken balalyǵy.
Yqtıarsyz kózimnen jas shyǵarǵan –
Qaıaýsyz ydysynyń tazalyǵy.

Qaıraty zor, bilmeıtin erinýdi,
Ne asyp, ne maqtanyp jeligýdi?
Eńbegimen kúneltken, syrǵa berik,
Unatpaıtyn orynsyz eligýdi.

Áýpishter ǵoı ósirgen malyn baıdyń,
Eńbegi – jemi bolǵan qomaǵaıdyń.
«Adaldyq – boryshym» dep sanaıtuǵyn,
Bar nıeti Áýpish pen Tom aǵaıdyń.

Kózime elesteıdi quldyq dáýir,
Adamdy «qul» degen sóz maǵan aýyr.
Shyn oılasam ekeýin salystyryp,
Tom aǵaıdan Áýpishtiń nesi táýir?

Tom aǵaıdy satady bazarǵa aıdap,
Kónbese, basyn alar, qylysh qaırap.
Erkin baılap otyrmyn men de Áýpishtiń,
Bosattym ony elge osyny oılap.

Áýpishti umytpaımyn ólgenimshe,
Ne ony, ne ol meni kómgeninshe.
Barlyǵyn sharýamnyń ózim qylam,
Qajymaımyn kárilik jeńgeninshe.

«Áýpish aǵa» deıdi ony balalarym,
Syılaıdy dep tek ata-analarym.
Janynyń syryn olar seze almaıdy,
Men kórem onyń artyq baǵalaryn.

Bilý qıyn syrlaspaı bizdiń jaıdy,
Kóleńkege pishken ton jaraspaıdy.
Adam úshin arymen oılamaǵan
Júksiz, oısyz júktimen sanaspaıdy.

Tatý tursa, adamǵa dúnıe keń,
Eńbek et, jer jetkilik beredi ken.
Adamnyń adal uly bolam deseń,
Aldymenen ózińniń nápsińdi jeń.


You Might Also Like