Taǵy, mine, tań da atty.
- Syrqatyńyz salmaqty...
İshken sharap, jegen et,
Baýryńyzdy jalmapty.
...Janarymdy jumyp em, ıir-qıyr jol jatty,
Iir-qıyr jol jatty, tuman basty jan-jaqty.
Esime aldym Qosjandy, esime aldym Qaljandy,
Maǵan uqsap olar da esterinen tanǵan-dy.
...Aýyrǵany belgisiz, netken syrqat aldampaz,
Aýyrmaı-aq, kóz ilmeı ótkizemin tańdardy.
Ras pa dep oılaımyn jalǵan dese, jalǵandy.
Oıran-asyr kún keship ortasynda dúrmektiń
Qıraǵan úı sıaqty, qırappyn ǵoı, bilmeppin.
Janashyrdyń aıtqanyn qulaǵyma ilmeppin.
Ózimdi-ózim qıratyp, ózimdi-ózim júndeppin.
Yńqyldaǵan syrqattar...
Uzaq tún men uzaq tań.
Dalada qys, qalanyń jotasyna muz artqan.
Bilip bolmas bir sumdyq janǵa batqan syzattan,
Qapastaǵy qyzdaımyn eriksizden uzatqan.
Aýyrady bir jerim, júregim be, janym ba?!
Asaý tolqyn oınaıdy alasuryp qanymda.
Ótken ómir uqsaıdy uzap ketken saǵymǵa,
Umtylamyn, biraqta, ustaı almaı-aq qoıdym,
Áıteýir bir ury júr meniń saıran baǵymda.
Jambasyma, qolyma qadalǵanda ıneler,
Sál seskenip, artynan jan rahat kúıge ener.
Júregimde jyr uıyp, qulaǵyma kúı keler.
Birer saǵat ótip-aq sol rahat joǵalyp,
Tiri jatqan mıyma myq capalap úımeler.
Joǵal, sary ýaıym!
Men tirimin, tirimin!
Tósengenim tiri jer, jamylǵanym tiri Kún.
Kóp kúnderi qýanysh, kóp kúnderdiń biri muń,
Eki aıaǵyn teń basqan azamattyń birimin!
Aqaý túsken motordaı endi osydan jóndelsem,
Quryp qalǵyr syrqattan qulantaza emdelsem,
Tart, qara jer, janymdy, ǵaıbat aıtyp egerde,
Isi qazaq balasyn bir-birinen kem kórsem.
Qadalýda sanyma sansyz ǵajap áli ıne...
Jan jubatar dos ta joq, jaýym da joq, árıne.
Aınalaıyn dáriger, aman-esen aıyqsam,
Búkil elimdi aralap, sálem berem ár úıge.

---