InfoHub Logo

Taraz qalasyndaǵy Nazarbaev Zıatkerlik mektebiniń on ekinshi synyp oqýshysy Dana Qurmanbek qurǵaq sarysý óndiretin bıznes-jobasyn júzege asyrýǵa eki mıllıon teńge utyp aldy. Onyń bıznes-bastamasyna «Atameken» Ulttyq kásipkerler palatasy «Bıznestiń jol kartasy-2020» baǵdarlamasy aıasynda qoldaý tanytyp otyr.

Jas bıznesmen óz ıdeıasyn jaqyn arada iske asyrýdy josparlap otyr. Josparyn júzege asyrýǵa ınvestısıa daıyn deıdi ol.

«Bizdiń elge qurǵaq sút sarysýy Reseı men Belarýsten ımporttalady. Al ony ózimiz óndire bastasaq qosymsha shyǵynnan arylar edik. Qurǵaq sarysý 150-den astam ónim túrlerin shyǵarýǵa qoldanylady. Bul - kosmetıkalyq jáne farmasevtıkalyq quraldar, shujyq jáne kondıterlik ónimder, balmuzdaqtyń túrleri», – deıdi Dana.

Aıta ketý kerek, Dana Qurmanbek - baǵdarlamanyń eń jas qatysýshysy. Onyń jasy nebári on segizde. Danamen qatar baıqaýǵa zeınet jasyna deıingi tájirıbeli kásipkerler de qatysqan. Oqýshy bıznes-josparyn jetekshisi, ekonomıka pániniń muǵalim-moderatory Álıa Jýsanbaevanyń basshylyǵymen muqıat quryp, eseptegen.

«Sút óniminiń qaldyqtaryn qaıta óńdeý arqyly qurǵaq sarysý óndirý jobasyn Taraz qalasyndaǵy Nazarbaev Zıatkerlik mektebiniń bazasynda júzege asyrǵaly otyrmyz. Eńbegimiz bolashaqta óńirdiń jáne eldiń ekonomıkasyna erekshe paıda ákeledi degen úmittemiz», – deıdi Álıa Mahtabekqyzy.

bilim-all.kz

---