Taý basyndaǵy oı
Shyqqanym – Shyńǵystaǵy bir bıik taý,
Jaqsy eken taýǵa shyǵyp taǵdyr synaý.
«Qaıyrly tún bolsyn» dep únsiz aıtyp,
Kún ketken soń tún keldi qarańǵylaý.
Aspandaǵy aı, juldyz – bári aılandy,
Jalǵyz-aq Temirqazyq tapjylmaıdy-aý.
Kún batyp, aı, juldyzdyń aınalýy –
Shynynda dóńgelegen jer júrisi-aý.
Jańbyr jaýdy jarqyldap, najaǵaılap,
Sýdan ot jaratylyp shyqqanyn-aý.
Kókten jańbyr quıady, jerden – bulaq,
Qansha aqsa da, olarda bar taýsylmaý.
Jylylyq pen salqynnan jaratylǵan,
Oılasam, onyń túbi – jerdiń býy-aý.
Kóz adasty, oı tapty, kórdińiz be?
Aqylmen synalmaǵan is buldyrlaý.
Kóz, qulaq, qol, muryn, til – bári aldaıdy,
Tetigi – taza aqylmen ólshep synaý.
Tereń oımen tekserip kún batyryp,
Sonda taýyp baılaǵan oıym mynaý:

Tuńǵıyq qarańǵy tún, jaryq kúndiz,
Birin-biri qýalap júr tynymsyz.
Birjolata qarańǵy bolmasyn dep,
Kómeski sáýle berer aı men juldyz.
Júrisi shataspaıdy, sharshamaıdy,
Dybys joq, kidiris joq, ne qalmaıdy iz.
Kún nuryn, jer júrisin, kóleńkeni –
Jaryq, ýaqyt, qarańǵy dep ataısyz.
Joq bolsa ystyq, jaryq, qarańǵylyq,
Bizdiń de múmkin be edi barlyǵymyz?
Syrtyn bilip, syrynan habarsyz bop,
Nadandyqpen sezbedik osyny biz.


You Might Also Like