InfoHub Logo

Nalchıkte (Kabardına Balkarıa) emdelip jatqanmyn. Jaz aılary bolǵan soń, jeńil kıimmen, plash ala salyppyn. Kúndiz-túni tópelep jańbyr jaýǵanda tońazyp, jylylaý keýdeshe almaǵanyma ókinip júrgenmin. Álde sol tóńirektegi "Alagır" sanatorıinde me eken, qazir aıyryp aıta almaımyn. Áıteýir jatyn korpýsy bólek, demalýshylar jan-jaqtan jınalyp, tamaqtanatyn úlken ashanasy bar. Ashananyń aldy úlken alań, aınalasyna jaǵalaı tal egilgen.

Birde tamaqtanyp bolyp, dalaǵa shyqtym. Qazir, jubymyzdy jazbaı birge júretin, bólmeles áıelderdiń, sol joly nege janymda bolmaǵanyna túsinbeımin. Myńdaǵan adam biri kirip, biri shyǵyp sapyrylysyp jatatyn ashananyń tóńireginde jan joq alań bos. Tek qana, oń jaqty boılaı ósken bıik, taldardyń kelesi shetinde bir áıel tur eken. Janyna jaqyndaı bergende, maǵan qarsy júrdi. Qolynda bir oraýly zaty bar. Áıeldiń túri kavkazdyq ekenin bildirip tur. Maǵan:

— Amansyń ba? — dep, qazaqsha til qatty. Men de sálemdestim.

— Mynaý taılaqtyń júninen toqylǵan keýdeshe edi. Alasyń ba? — dep, qolyndaǵysyn nusqady.

Ózim azdap tońazyp júrgen meniń de kórgim kelgen. Ashyp qarasam, toqýy qarapaıym, túıe júnnen toqylǵan shaǵyn keýdeshe. Erekshe sándi emes, biraq jyly sıaqty. Aldy sál úshburyshtap oıylǵan, kostúmniń ishinen de kıýge bolady.

— Taılaqtyń júniniń emdik qasıeti bar. Alyp al, — dedi áıel.

Men aldym. Ekeýmiz biraz áńgimelestik.

— Qazaqsha qaıdan bilesiń, — deımin.

— Qarachaılardyń tili qazaqsha men uqsas qoı — dep, kúldi...

...Sodan beri kóp jyl ótti. Bálkim 20, tipti odan da kóp jyl ótken shyǵar. Ol keýdeshe jaı ǵana kıim emes, meniń birinshi dárigerim boldy desem de artyq bolmas. Syrqat súıegimdi syzdatqanda, basa qoısam aýyrǵany sap bolady. Sýyqtap qalǵanda kıe qoısam, tıgen salqyndy solqyldatyp turyp soryp alady. On bes jasymnan bastap azaptan kóz ashpaǵan, janyma jaı taptyrǵan osy keýdeshe. Bul, beıne, tirshilikte aýrý azasyn kóp tartqan maǵan, Alla taǵalanyń ózi jibergen bir emi-aý degen oıǵa kelemin. Shynynda, solaı emes pe eken...

---