Tań atty.
Kelip qaldy ǵajaıyp jyl,
Kel, aqyn, keremet bir jazaıyq jyr.
Tomyryq lırıka, toqtaı turshy,
Tolqyndy tolǵaý nege azaıyp júr?
Kel, aqyn, keremet bir jazaıyq jyr.
Osaldan emes edi sharyq-shamań,
Daıda úniń qyran bolyp qalyqtaǵan?
Kidirip, kibirtiktep basa almaısyń,
Shopannyń shaýqaryndaı aryqtaǵan,
Qaıda úniń qyran bolyp qalyqtaǵan?!
Shyqshy bir İlıastaı sańlaqtanyp,
Otyrshy óz ornyńa tańdap baryp.
Buıyǵy ún, bulaq - sezim aýlaq qalyp,
Tóńkeril tolqyn bolyp, aýnap baryp.
Shyqshy bir İlıastaı sańlaqtanyp.
Shabyttansań sharq uryp keteriń shyn,
Jyryńnan jalyn laýlap, ot órilsin.
Tizginin tejemegen İlıas - jyr,
Minbege Taıyr bolyp kóterilsin.
Úninen jalyn laýlap, ot órilgin.
Kel, aqyn oılan, aqyn; tolǵan, aqyn.
Shyn aqyn shyn qyrandaı qomdanatyn.
Keziń keldi Sáken bop uran tastap,
Qasymdaı júregimen tolǵanatyn,
Qalamyn qarýyndaı qolǵa alatyn.
Olar joq, bári bir-bir dastan edi,
Qondyrǵan alaqanǵa asqar eli.
Bolsa eger Sáken, İlıas, Qasym, Taıyr,
Jurtyn bir jelpindirip tastar edi,
Osynaý jyr báıgesin bastar edi.
Oqýshym, mynaý nege bósti deme,
Jyr qalyp, áńgimege kóshti deme.
Esimi esil bizdiń aqyndardyń
Eli eskirmeı, sirá da, eskire me?
Oqýshym, nege orynsyz bósti deme!
Olar da osynaý jyldy armandaǵan,
Ottyń basyn kúıittep, aldanbaǵan.
Kezinde oq bop, ot bop janǵan qalam,
Tolqyndy tolǵaý jyrdan arlanbaǵan.
Qolyma berińdershi, aǵaıyndar,
Qaıda júr arýaqtardan qalǵan qalam?!
Kerneýindeı kómeıleri kúmbirlegen,
Týlaǵan tulparlardy kim bilmegen.
Jazaıyn jyrlaryńnyń jalǵasyn men,
Jazýǵa jarqyndarym úlgirmegen...
Jyl keldi ǵajaıyp bir aq tańymen,
Baq tańymen, aq ulpa aq qarymen.
Kórkem eken, mynaý jyl kórikti eken,
Paraǵyn jylnamanyń aqtaryp em.
Dúnıe, toılaıdy eken shattanyp el.
Al, aqyn, aqtara gór halqyńa syr,
Bóle jyrǵa, elińniń dańqyn asyr.
Bir otaýy - Otannyń Qazaqstan,
İrgesin kótergeli jarty ǵasyr,
Sen sony madaqtaı bil, dańqyn asyr.
Jetkiz jurtqa búginin, ótkenderin,
Qysyn, kúzin, jazy men kóktemderip.
Jadynda tutsyn urpaq, jasyrmaı aıt:
Aqtaban shubyryndy ótkelderin,
Arýdy aram jandar ópkenderin,
Boz ingen botasy ólgen boı jaza almaı,
«Elim-aı»
Arýana shókken jerin.
Ólshesin búginimen ótkenderin!
Kóre almaı Jeruıyqtyń kók belderin,
Kórset Asan zapyran tókken jerin.
Túsinsin de tushynsyn baqytty úrpaq,
Babalary ne jańa shekkenderin!
Oktábrdi aıt burqanǵan, daýyldaǵan,
Qazaq jeri qushaqtap, qabyldaǵan.
Oktábrdi - búgingi baqytyńdy aıt,
Meke barsa babalar tabylmaǵan.
Qara bulty basynan arylmaǵan,
Qalaı meniń ózgerdi taýym, dalam.
Oktábrdi aıt. Oktábr - baýyr maǵan.
Keldi bıyl elýge elim meniń
Aýyr bultym aryldy, jeńildedim.
Oktábrdi aıt!
Keshegi qazaq eli
Shýaq bolyp kosmostan tógilgenin,
Dúnıege dán bolyp sebilgenin.
Barlyǵyn aıt.
Birin de jasyrmaǵyn,
Eseptelsin altynmen asyldaryń.
Tutqanyn aıt qazaqtyń qara bultty,
Elektr bop álemge shashylǵanyn.
Tún boıy batyp, tań bolyp ashylǵanyn.
Maqtanyp aıt fashısi jeńgenińdi,
Barlyǵyn da maıdanǵa bergenińdi.
Qoıshy bolyp attanyp Atbasardan,
Jeńimpaz bop Berlınge tóngenińdi,
Qolbasy fúrerdiń «altyn» basy,
Qoıshybaevqa olja bop, óńgerildi.
Jıyrma bes, minekı, jyl ótipti,
Jıyrma bes...
Dúnıe jyr etipti.
Biz jeńgen jıyrma bes jyldan beri
Evropa tastady qul-etikti.
Jeńisti aıt,
Qazaq qanyn aıamaǵan,
Otandy aıt,
Óz balasyn aıalaǵan,
Qazaqtyń dalasyn aıt,
Búkil Odaq
Saıa ǵyp syn saǵatta saıalaǵan.
Bıylǵy jyl barlyǵy keledi eske:
Ekitalaı jeńgenim eregeste,
Odaqqa oq atqanda,
Qazaqstan,
Keýdesin oqqa qosqan sen emes pe eń?!
...Bıyl toı Lenın dep bastalady,
Lenın-dúnıeniń tas qamaly.
Ár jylda bizdiń árbir qýanyshty,
Ilıchtiń ózi kelip basqarady.
Ilıch dep kúnniń aty bastalady.

---