اش قارىن جۇبانا ما مايلى اس جەمەي؟
اش قارىن جۇبانا ما مايلى اس جەمەي؟
توق تۇرا الماس دامدىدەن ءدامدى ىزدەمەي.
"ءبىر تويعان — شالا بايلىق" دەگەن قازاق،
ەت كورىنسە، قايتەدى كۇيسەي بەرمەي؟
ەڭبەك جوق، حارەكەت جوق قازاق كەدەي،
تاماق اڭدىپ قايتەدى تەنتىرەمەي؟
ەت پەن قىمىز سىقىلدى اس جوق دەيدى،
ول نەمەنە جوقتىقتىڭ اسەرى ەمەي؟
ەت، قىمىز تاماق بولسا اركىمگە ارزان،
ءتاتتى، ءدامدى ىزدەر ەڭ ونان دا ءارمان.
ءوز پۇلىڭمەن ءحالىڭ جوق كۇندە تويار،
قۇلدىق ۇرىپ اسايسىڭ اسى باردان.
ءوز ۇيىڭنەن تويارعا قولىڭ قىسقا،
اس بەرەر اۋىل ىزدەپ ءجۇرسىڭ بوسقا.
ءبىر جىلىك پەن ءبىر اياق قىمىز بەرگەن
دەرەۋ سەنى جۇمسايدى ءبىر جۇمىسقا.
جالعا ءجۇر، جات جەرگە كەت، مال تاۋىپ كەل،
مالىڭ بولسا، سىيلاماي تۇرا الماس ەل.
قارۋىڭنىڭ بارىندا قايرات قىلماي،
قاڭعىپ وتكەن ءومىردىڭ ءبارى دە — جەل.
تاۋەكەلسىز، تالاپسىز مال تابىلماس،
ەڭبەك قىلماس ەرىنشەك ادام بولماس.
ەسەك ك...ن جۋساڭ دا، مال تاۋىپ كەل،
قولعا جۇقپاس، ەش ادام كەمىتە الماس.
قۋلىق، سۇمدىق، ۇرلىقپەن مال جيىلماس،
سۇم ءناپسىڭ ءۇيىر بولسا، تەز تىيىلماس.
زيان شەكپەي قالمايسىڭ ونداي ىستەن،
مال كەتەر، مازاڭ كەتەر، ار بۇيىرماس.
اساعان، ۇرتتاعانعا ەز جۇبانار،
سەنىمدى داۋلەت ەمەس سەن قۋانار.
ەڭبەك قىلماي تاپقان مال داۋلەت بولماس،
قاردىڭ سۋى سىقىلدى تەز سۋالار.
مىنەر اتىن، كيىمىن ىپ-ىقشام قىل،
سىمباتتانىپ، سىمپيىپ تاماق اڭدىپ،
بۇراڭداپ جىلى ءجۇزىن اسقا ساتقان
انتۇرعانعا قوسىلماي كەتسىن قاڭعىپ.
كۇلدىرگىشتەۋ، كۇلكىشىل، قالجىڭعا ۇستا،
كەزەگەن يت تىم-اق كوپ ءبىزدىڭ تۇستا.
ءوز ۇيىنەن جيرەنىپ، قاشىپ جۇرگەن
انتۇرعانعا قوسىلما قاپىلىستا.


You Might Also Like

جاڭالىقتار

جارناما