ءبىر سۇلۋ قىز تۇرىپتى حان قولىندا
ءبىر سۇلۋ قىز تۇرىپتى حان قولىندا،
حان دا جانىن قىيادى قىز جولىندا.
التىنكۇمىس كيگەنى، قامقا، تورعىن،
كۇتۋشى قىز كەلىنشەك ءجۇر سوڭىندا.
دەگەن ءسوز: "بۇقا بۋعا، ازبان دۋعا"،
حان قارىق بوپ ءتۇسىپ ءجۇر ايعاي شۋعا.
ەتىمدى شال سىيپاعان قۇرت جەسىن دەپ،
جارتاستان قىز قۇلاپتى تەرەڭ سۋعا.
ءسان سالتانات جۇبانتپاس جاس جۇرەكتى،
كىم دە بولسا تۇرعىسىن كوكسەمەكتى.
مەزگىلى وتكەن داۋرەندى قۋالاعان،
نە قىلسىن ءبىر قارتايعان ءوۋ سۇيەكتى.
كارى، جاس داۋرەنى وزگە تاتۋ ەمەس،
ەپكە كونەر ەت جۇرەك ساتۋ ەمەس.
كىمدە كىم ۇلكەن بولسا ەكى مۇشەل،
مال بەرىپ العانمەنەن ساتىن ەمەس.
ەسەرلەر جاس قاتىندى تۇتادى ەكەن،
جاس قايعىسىن بىلدىرمەي جۇتادى ەكەن.
ورتاسىندا بۇلاردىڭ ماحاببات جوك،
تۇساپ قويعان قاشىرار بۇقا ما ەكەن؟
باي قارتايسا، مالىنا بەرەر شىلبىر،
مال ءومىردى جانعىرتپاس، قۇداي ۇرعىر.
بىرەۋدىڭ قىزىن الىپ مالعا ساتىپ،
باياعىنى ىزدەگەن قانداي قۇرعىر؟
قاتىنىم قالاي دەمەس اقساقال باي،
سونىمەن دوس بوپ ءجۇرسىڭ،ياپىرىم اي!
قۋ قاتىننىڭ مايىسسا، ءماز بولاسىڭ،
شايتاننىڭ شاكىرتىنىڭ قىلىعىن اي!
قارتاڭ باي، قاتتى ساق بول، تىلگە كونسەڭ،
ءمۇيىز شىعار قاتىننىڭ تىلىنە ەرسەڭ.
ءتىپتى وڭباسسىڭ، وزىڭە ءوزىڭ ءماز بوپ،
داستارقان مەن قاتىندى ماقتان كورسەڭ.
كىناسىز بايبىشەمەن بولادى اراز،
جاستىڭ كوڭىلى جىلىماس، ول وزىنە از.
بىرەۋى كوك بالدىرعان، ءبىرى قۋراي،
ءبىر جەرگە قوسىلا ما قىس پەنەن جاز؟
ۇنەم بولماس قۇيرىقتى بۇلاڭداتقان،
ساۋىرىنا شاپاقتاپ، ءسۇىپ جاتقان.
ەكى كوڭىل اراسى جىلشىلىق جەر،
ونى قايتىپ قوسادى ول انت اتقان؟


You Might Also Like