![«بولاشاق» توڭىرەگىندەگى داۋ: ۇقك مەن ءىىم ۇلىبريتانيادا قالعان ستۋدەنتتى تابۋدى سۇراپ وتىر](http://infohub.kz/uploads/thumbnail/20240528091334476_big.png)
- 28 مام. 2024 09:19
- 320
«بولاشاق» توڭىرەگىندەگى داۋ: ۇقك مەن ءىىم ۇلىبريتانيادا قالعان ستۋدەنتتى تابۋدى سۇراپ وتىر
ءحبو-نىڭ بۇرىنعى قىزمەتكەرلەرى قىزمەتتىك الاياقتىق جاساعانى ءۇشىن جاۋاپقا تارتىلماق
حالىقارالىق باعدارلامالار ورتالىعى «بولاشاق» باعدارلاماسىنىڭ بۇرىنعى ستيپەندياتىنىڭ كەپىلگەرلەرىنىڭ مالىمدەمەلەرىنە تۇسىنىكتەمە بەردى. ستيپەنديات ۆالەريا گاۆريلەنكو سمپ قىزمەتكەرلەرىمەن كەلىسىمگە كەلىپ، زاڭسىز تۇردە ەكى پاتەردى كەپىلدەن شىعارىپ، ۇلىبريتانياعا كەتكەن، دەپ حابارلايدى infohub.kz.
حبو باسپا ءسوز قىزمەتىنىڭ مالىمەتىنشە، ۇلىبريتانياعا كەتەر الدىندا «بولاشاق» باعدارلاماسىنىڭ ستيپەندياتى ۆالەريا گاۆريلەنكو كەپىل رەتىندە ەكى جىلجىمايتىن مۇلىك نىسانىن ۇسىنعان. الايدا ولاردىڭ قۇنى وقۋ قۇنىن تولىقتاي جابا الماعاندىقتان، ستيپەنديات ءۇشىن رەسمي تۇردە ەكى كەپىلگەر – ناتاليا ۆوروبيەۆا مەن ماكپال داريبايەۆا قول قويعان. بۇل ايەلدەر ورتالىقپەن كەپىل شارتىن جاساسقان. شارتتا ستيپەنديات مىندەتتەمەلەرىن ورىنداماعان جاعدايدا ورتالىق كەپىلگەردەن تالاپ ەتۋگە قۇقىلى ەكەنى كورسەتىلگەن.
«قىزمەتتىك تەكسەرۋ ناتيجەسىندە، 2019 جىلدىڭ 13 مامىرىندا ورتالىقتىڭ بۇرىنعى پرەزيدەنتى ج. مەلدەشوۆ، ۆيسە-پرەزيدەنت م. الپىسباي، زاڭ دەپارتامەنتىنىڭ باستىعى ا. شارامبايەۆتار ستيپەندياتتىڭ مىندەتتەمەلەرىن تولىق ورىنداۋىنا بايلانىستى جىلجىمايتىن مۇلىكتى كەپىلدەن بوساتۋ تۋرالى حابارلاما بەرگەنى انىقتالدى. ياعني، ءبىر جىل بويى قازاقستان رەسپۋبليكاسىندا ەڭبەك قىزمەتىن جۇزەگە اسىرعان سوڭ»، – دەپ حابارلادى حبو.
بۇل زاڭبۇزۋشىلىق ستيپەندياتتاردى تەكسەرۋ بارىسىندا انىقتالعان. وسىدان كەيىن ورتالىق بۇرىنعى قىزمەتكەرلەردىڭ قىزمەتتىك جالعان قۇجات جاساۋ فاكتىلەرى بويىنشا ءتيىستى ورگاندارعا ارىزدار جىبەرىپ، كىنالىلەردى زاڭمەن قاراستىرىلعان جاۋاپكەرشىلىككە تارتۋدى سۇرادى.
«2024 جىلدىڭ ءساۋىر ايىندا ۇلتتىق قاۋىپسىزدىك كوميتەتى مەن ىشكى ىستەر مينيسترلىگىنە گاۆريلەنكو ۆ.-نىڭ ناقتى ورنالاسقان جەرىن انىقتاۋ ماقساتىندا حاتتار جىبەردى»، – دەلىنگەن حابارلامادا.
«بولاشاق» باعدارلاماسىنىڭ شەتەلدە جۇرگەن جانە مەملەكەت الدىنداعى كەلىسىم-شارتتىق مىندەتتەمەلەرىن ورىنداماعان ستيپەندياتتارىن قايتارۋ بويىنشا جۇيەلى جۇمىس جۇرگىزىپ جاتقانىن اتاپ ءوتتى.
«13 مىڭ «بولاشاق» باعدارلاماسى تۇلەكتەرىنىڭ ىشىندە 1%-دان ازى وقۋدى اياقتاي الماي، نەمەسە مەملەكەت الدىنداعى ەڭبەك مىندەتتەمەلەرىن ورىنداماي، ستيپەنديادان ايىرىلدى. ورتالىق مەملەكەتتىك بيۋدجەتكە اي سايىن شامامەن 200 ملن تەڭگە قايتارىپ وتىرادى. 2023 جىلى بيۋدجەتكە 1،9 ملرد تەڭگە قايتارىلدى، ال 2024 جىلدىڭ 27 مامىرىنا دەيىن – 716 ملن تەڭگە، 43 ادام مەملەكەت الدىنداعى قارىزىن تولىق وتەدى»، – دەپ جاۋاپ بەردى ورتالىقتا.
ەسكە سالا كەتەيىك، «بولاشاق» باعدارلاماسىنىڭ بۇرىنعى ستيپەندياتىنىڭ كەپىلگەرلەرى ناتاليا ۆوروبيەۆا مەن ماكپال داريبايەۆا حالىقارالىق باعدارلامالار ورتالىعىنىڭ ولاردىڭ كونستيتۋسيالىق قۇقىقتارىن بۇزعانىن مالىمدەگەن.
ولاردىڭ ايتۋىنشا، قىز زاڭسىز تۇردە حالىقارالىق باعدارلامالار ورتالىعىنىڭ كەپىلىنەن ەكى پاتەرىن شىعارىپ، ۇلىبريتانياعا كەتكەن. 2 جىلدان كەيىن ول ستيپەنديادان ايىرىلعان. ءبىراق ستيپەندياتتىڭ وقۋ شىعىنىن وتەۋ قارىزىن ورتالىق كەپىلگەرلەردەن ءوندىرىپ الماقشى.