بوزتورعاي
«قيىن جول قيامەتتىڭ - تار-دى» - دەيدى،
«ءبىر جاعى- سۋ، ءبىر جاعى وت، جار-دى» - دەيدى.
«حازىرەت عالى پايعامبار زامانىندا
ماڭايىندا ءبىر ءمۇساپىر بار-دى!» - دەيدى.
كوڭىلىندە ول ءمۇساپىر الاسى جوق،
ەرلى-بايلى ەكى باس ، بالاسى جوق.
جارلىعى جاراتقاننىڭ سونداي قاتتى:
ءبىر جالعىز تىم بولماسا قاراسى جوق.
قۇدايى بەرەدى ەكەن ەسىنە الىپ،
اسى جوق ىشەرىنە بايعۇس كارىپ.
كۇنىندە امالى جوق ول بەيشارا،
سۋلارعا جۇرەدى ەكەن قارماق سالىپ.
ۇشقان كۇس، جۇگىرگەن اڭ، - ءبارى تاماق،
شاكىرتتەر ۇستازىنان الار ساباق.
ۇزىن كۇن قارماق سالىپ جۇرسە-داعى،
تىلىنەر قارماعىنا جالعىز شاباق.
ول جارلى قارماق سالىپ، قايتادى ەكەن،
كەدەيلىك مۇساپىرگە باتادى ەكەن.
ەكەۋى ءبىر شاباقتى قورەك قىلىپ،
سونىمەنەن اۋقاتى ءوتىپ جاتادى ەكەن.
ول جارلى بۇرىنعىداي بولا المادى،
كوڭىلى كۇندەگىدەي تولا المادى.
ءبىر كۇنى كۇنى بويى قارماق سالىپ،
ەش نارسە قارماعىمەن الا المادى.
«قيىن جول قيامەتتىڭ - تار-دى» - دەيدى،
«ءبىر جاعى - ءورت، ءبىر جاعى وت، جار-دى» - دەيدى.
«ول كۇنى اش بولعان سوڭ جازعان كارىپ،
كاپىرگە تاماق سۇراي باردى»، - دەيدى.
جوقتىقتا قينار ءناپسى كارىپ جاندى.
كورەدى ول ءمۇساپىر اتپاس تاڭدى.
نە بەرسىن تەگىن تاماق ول كاپىر دە
ءبىر تەڭگەنىڭ تاماعىن قارىزعا الدى.
گىايعامبار بىزدەن بۇرىن ءوتتى دەيدى،
كەمەلگە تىلەۋلى قۇل جەتپەيدى.
«پالەن كۇنى كەگىل تاۋىپ بەرەمىن!»-دەپ،
ءبىر كۇندى بولجال قىلىپ ، كەتتى دەيدى.
ول جارلى بۇرىنعىداي بولا المادى،
كوڭىلى كۇندەگىدەي تولا المادى.
بولجال كۇنى بولعاندا، بارىپ ەدى،
بەرەرگە جالعىز تيىن تابا المادى.
جوقتىقتا قينار ءناپسى كارىپ جاندى،
كورەدى ول ءمۇساپىر اتپاس تاڭدى.
كۇنىندە ول تەڭگەسىن وتەي الماي،
ەندى جارلى موينىنا ءوسىم سالدى.
جوقتىقتا قينار ءناپسى كارىپ جاندى،
كورەدى بۇ ءمۇساپىر اتپاس تاڭدى.
كۇنىندە ول تەڭگەسىن وتەي الماي،
مىڭ قىلىپ، ءبىر تەڭگەسىن حاتقا سالدى.
جارلىعا مىڭ تەڭگە اقشا ءتۇستى دەيدى،
كەدەيلىك بارىنەن دە كۇشتى دەيدى.
اقشاسى مىڭعا جەتىپ كەتكەننەن سوڭ،
جارلىنى: «اقشام بەر!» - دەپ، قىستى دەيدى.
- قايدان تاۋىپ بەرەمىن ساعان؟ - دەيدى،
- از عانا ايان بەرشى ماعان! - دەيدى.
- ساعان بەرەر ءبىر تيىن ەش نارسەم جوق،
بارايىن مۇحاممەدكە تامان! - دەيدى.
جامان جوق بۇرىس باسقان اسقانىنان ،
ءبىر تەڭگە مىڭعا قادام باسقانىنان.
مىسىردى بۇل ءمۇساپىر قىرىق اينالدى،
بارارىن بىلمەي قايدا ساسقانىنان.
شاھاردا بۇل بارماعان ەسىك قالماي،
باس سالىپ ەشبىرىنە كىرىپ بارماي.
سىلتاۋ عىپ انە-مىنە دەگەنمەنەن،
تەڭگەسىن قويار ەمەس كاپىر الماي.
ول جارلى ءبىر اللاعا نالىپ كەلدى،
قويماسىن ول كاپىردىڭ تانىپ كەلدى.
وزىنەن بەرەر نارسە جوق بولعان سوڭ،
ساسقاننان مۇحاممەدكە الىپ كەلدى.
قۇدايدىڭ سالعانىنا كونىپ كەلدى،
ەنگەندە مۇحاممەدكە كۇلىپ كەلدى.
مۇحاممەد، ساقابالار - ءبارى وتىرعان
جەرىندە سالەم بەرىپ كىرىپ كەلدى.
- ۋاعالەيكۋم ءاسسالام، اي، ءمۇساپىر،
بۇل قالاي قاسىڭداعى جۇرگەن كاپىر؟
ەكى كوزىڭ جىلاۋدا، ا، ءمۇساپىر،
قاي جاققا الىپ سەنى بارا جاتىر؟
- سىيىنساڭ ءبىر اللاعا، بۇرىن سىيىن،
ءىس وتكەن سوڭ سىيىنساڭ، بولار قيىن.
بار ەدى بۇ كوپىردىڭ مەندە اقشاسى،
بەرەرگە تابا المادىم جالعىز تيىن.
- جاراتقان ءبارىمىزدى ءبىر قۇداي-دى،
جاراتتى جارىق قىلىپ كۇن مەن ايدى.
وزىڭنەن بەرەر نارسەڭ جوق بولسا ەگەر،
باراسىڭ مۇنى ەرتىپ ەندى قايدا؟
- جاراتقان جابدىعىمىز ءبىر قۇداي-دى،
جاتقانعا شالقاسىنان دۇنيە قايدا ؟
ون سەگىز مىڭ عالامنىڭ پاتشاسى - ءسىز،
ءبىر پايداڭىز تيەر مە ەكەن وسىندايدا؟
وزىنە مال جيمادى ول پايعامبار،
مالى كوپ ساقابالار پەيىلى تار.
جان-جاعىندا وتىرعان ساقابالار
قاراسا، مۇحاممەدىم جەرگە قارار.
اشۋى ەر عالىنىڭ ەندى كەلدى-ەي،
كوڭىلىن كەڭ جاراتقان حاق شالقار كولدەي.
- بابام جەرگە قارادى - دەپ، حازىرەت عالى، -
- باتا بەر، مەن ۇزەم! - دەپ، تۇرا كەلدى-ەي!
- باتا بەر، مەن ۇزەم! - دەپ، تۇرا كەلدى-ەي
اشۋى ەر عالىنىڭ قاتتى كەلدى.
ادامنىڭ ءون بويىنا بىتكەن تۇگى
كيىمنەن نايزاداي بوپ، شىعا كەلدى.
ول مۇحاممەد پايعامبار باتا بەردى،
عالىنىڭ ايتقان ءسوزىن قابىل كوردى.
باباسىنان باتا الىپ حازىرەت عالى
ەرىتىپ ول ءمۇساپىردى ۇيگە كەلدى.
شۇكىر قىلدىم قۇدايدىڭ بۇل ىسىنە،
تاعى تاۋبە قىلامىن ءار ىسىنە.
- اقشا بار ما كاپىرگە بەرەتىن؟ - دەپ،
ءۇيدىڭ ءىشىن ءتىنتتىردى بيبىسىنە.
«جوق ەدى!» - دەپ، اۋزىنا الا المادى،
كوڭىلى كۇندەگىدەي بولا المادى.
ءۇيدىڭ ءىشىن اقتارىپ قاراسا دا،
بەرەرگە جالعىز تيىن تابا المادى.
قايعىسىز حازىرەت عالى ەر-دى دەيدى،
بەرەر نارسە تاپپادى ەندى دەيدى.
«بۇل اقشاڭدى تاۋىپ ۇزەرمىن!» - دەپ،
ەكى ۇعىلىن (ۇلىن) كاپىرگە بەردى دەيدى.
حاسەن مەن حۇسايىندى الدى دەيدى،
قۋانىپ كاپىر ۇيگە باردى دەيدى.
ەكى ەتەگىن بەلىنە ءتۇرىپ الىپ،
ءبىر جاققا بەتىن تۇزەپ سالدى دەيدى.
جولىندا حازىرەت عالى جالعىز ءجۇردى،
جالعىز ءجۇرىپ، كوپ ۇلت مولا كوردى.
ول مولانىڭ باسىنا كەلدى-داعى،
وتىرىپ حازىرەت عالى دۇعا (دۋا) قىلدى.
مولادا ءبىر تورعاي وتىر، كەزىپ سالدى،
تورعايدى كورەمىن دەپ كوڭىلىنە الدى.
ەر عالى اينالدىرىپ كورىپ ەدى،
سول جەردە كورگەننەن سوڭ، قايران قالدى.
«ۇستاپ الىپ تورعايدى كورسەم!» - دەيدى،
«حاسەن مەن حۇسايىنعا بەرسەم!» - دەيدى.
«ەرىككەندە ەرمەك قىلىپ، وينار ەدى،
الىپ بارىپ ولارعا بەرسەم!»-دەيدى.
نە كۇشتى، ويلاپ تۇرسام، قۇداي كۇشتى،
اۋزىما ايتىپ ەدىم، قۇداي ءتۇستى.
شاپ ەتىپ اياعىنان ۇستاپ ەدى،
تورعاي قۇس جۇدىرىقتاي الدى دا، ۇشتى.
ەر عالى ءبىر اللاعا نانىپ كەتتى،
بولارىن ءبىر تاماشا تانىپ كەتتى.
«ماعان ەندى نە پار؟» - دەپ، جۇرگەن عالى -
جۇدىرىقتاي ءبىر تورعاي الىپ كەتتى.
جاراتقان جەر دۇنيەنى جەكسەنبى كۇن،
قاراڭعى ولگەندەرگە بولادى ءتۇن.
«حازىرەت عالى، تورعايدان ايرىلما!» - دەپ،
ارتىنان اششى داۋىس شىعادى ءۇن.
ول تورعاي اسپانعا شىرقاپ شىقتى، قايرىلمادى،
سويتسە دە حازىرەت عالى قايعىرمادى.
ەرلىكپەنەن تورعايدى تۇتىپ ەدى ،
اقىرىندا ەرلىكپەن ايرىلمادى.
قايعىرىپ حازىرەت عالى ساسپادى ەندى،
ءبىر جولعا قۇداي تاعالا باستادى ەندى.
ول تورعاي اسپانمەنەن الىپ كەلىپ،
عالىنى جاپان تۇزگە تاستادى ەندى .
ەر عالى بۇرىنعىداي كۇلە المادى،
قالدى جاياۋ استىنا ات مىنە المادى.
عالىعا ءبىر زور ۋايىم ەندى ءتۇستى،
ءوزى قايدان كەلگەنىن بىلە المادى.
ەر عالى تاۋبە قىلىپ، كۇلدى دەيدى،
بولعانىن ءبىر عاجاپ ءىس ءبىلدى دەيدى.
- يا، قۇداي، ءوزىڭ وڭعا باستا! - دەۋمەن
اياڭداپ بەت الدىنا ءجۇردى دەيدى.
جۇرە - جۇرە ءبىر اسقار بەلگە كەلدى،
ءوزى تۋىپ كورمەگەن جەرگە كەلدى.
ءار جولعا قۇدايىمنىڭ ءوزى باستار.
ءبىر كوپ جويقىن ەن جاتقان ەلگە كەلدى.
ەر عالى ەلگە قاراي ءجۇردى دەيدى،
ءبىر شالقاردىڭ ىلگىنە كىردى دەيدى.
ءبىر ەركەك جوق كورىنگەن، ءبارى ۇرعاشى،
ءبىر قاراشا ءۇي كورىپ، كەلدى دەيدى.
كەلدى دە قاراشا ۇيگە سويلەس كىلدگ،
سويلەس قىلسا، ءبىر جامان كەمپىر كەلدى.
- كەمپىر-اۋ، ءتىرى ەركەگىڭ ەلىڭدە جوق،
سۇرايمىن، ءجونىڭدى ايتشى، نە ەلسىڭ؟ - دەيدى.
- ايتايىن ءجونىمىزدى سىزگە باتىر،
سۇراساڭ، ءجونىمىزدىڭ ءوزى كاپىر.
بار ەركەگى ەلىمنىڭ تويعا كەتتى،
پاتشامىز وسى ۋاقتا توي قىش جاتىر.
عالىنىڭ اۋادى ەندى تەنتەك ويى،
كەمپىردىڭ قوزعالادى تۇلا بويى.
- قيمىلداعان ەركەگىڭ ءبارى كەتىپ،
ول قىلعان پاتشاڭىزدىڭ نەنىڭ تويى؟
- ءبىر جەرگە تامام كىسى ورنايتۇعىن،
مويىنىن بوتەن جاققا بۇرمايتۇعىن.
پاتشانىڭ ءماجىلىسى بار جۇما سايىن،
ساۋىق قىپ، كەڭەس قىلىپ جىرلايتۇعىن.
- كەتىپتى ءتىرى ەركەگىڭ تامام! - دەيدى،
- نە بولدى وندا بارماي ساعان؟ - دەيدى.
- مۇسىلماننىڭ دىنىنە كىرگىزەيىن،
ول تويىڭ تۋرا سىلتە ماعان! - دەيدى.
- بارار بولساڭ، كوپ تۇرما مۇندا - دەيدى.
-مەنىڭ ايتقان ءسوزىمدى تىڭدا! - دەيدى.
-سوناۋ جەرگە بارعاندا، داۋىس شىعار،
توي قىلىپ، شۋلاپ جاتقان سوندا! - دەيدى.
- ءبىر جاقسىلىق قىلايىن، كەمپىر! - دەيدى،
- ءتىلىڭدى كاليماعا كەلتىر! -دەيدى.
- مۇسىلماننىڭ دىنىنە كىرگىزەيىن،
- «ءلا-يلا-يلا-اللا!» - كەلتىر! - دەيدى.
- ءدىنىمدى بەرمەن، ءتىلىمدى بەرسەم-داعى،
كوڭىلىم بەرمەن، سوزىڭە ەرسەم-داعى.
ءتىلىمدى كاليماعا كەلتىرمەيمىن،
ءوز كۇمىمنان شىقپايمىن ولسەم-داعى!
سونان سوڭ حازىرەت عالى تاستى دەيدى،
كەمپىر جامان ول قورقىپ ساستى دەيدى.
- ءوز كۇمىڭنان شىقپايتىن نەمە ەكەنسىڭ،
- دەپ كەمپىردى دارعا (داراعا) استى دەيدى.
كەمپىردەن ءبىر اشۋىن الدى دەيدى،
كەمپىر بايعۇس تىرايىپ قالدى دەيدى.
ەكى ەتەگىن بەلىنە ءتۇرىپ الىپ،
ەر عالى تويحاناعا باردى دەيدى.
سول تويعا كەلدى جاياۋ باتىر،
كاپىرگە-جۇرگەن جەرى - زامان اقىر.
سامساعان سارى قولعا كەلدى جەتىپ،
توي قىلىپ، شۋىلداپ جاتىر تامام كاپىر.
حازىرەت عالى سول تويعا كەلدى جايناپ،
كاپىرلەر شۋلاپ جاتىر كۇلىپ-ويناپ.
كىرىپ بارىپ وتىردى ورتاسىنا
سانسىز قۇلدىڭ ءبارىنىڭ كوزىن بايلاپ.
سىيىڭدى حازىرەت عالى اللاسىنا،
كىرىپ بارىپ وتىردى ورتاسىنا.
ماس بولعان اراق ءىشىپ، ساۋىق قىلىپ،
ەندى كەڭەس ايتتىرماق مولداسىنا.
كاپىرلەر ءوز ەسىنەن شىقتى دەيدى،
ءبىر-بىرىن اراق بەرىپ جىقتى دەيدى.
سول ازان سالدىرتقالى مولداسىنا،
باسىنا مۇڭتاراپىڭ شىقتى دەيدى.
- جىگىتتەر، ال تىڭدايىق، كىدىرىڭىزشى،
تىڭداساڭىز قۇلاق سالىپ: «ە!» - دەڭىزشى!
«مۇنارانىڭ باسىنا شىققاننان سوڭ،
ازاندا ايتاتۇعىن نە؟» - دەڭىزشى!
بوقتايدى: ورازا، ناماز اۋەل يمان،
بوقتايدى تاعى ونان سوڭ كىتاپ «قۇران».
ءجۇز جيىرما ءتورت مىڭ پايعامبار بوقتاپ بەرىپ،
تۇك قالدىرماي ءتورت جاردان، ساقابادان.
ول مولدا بۇرىنعىداي بولا المادى،
كوڭىلىنە كۇندەگى ءسوز قونا المادى.
ايتايىن دەپ ەنتەلەپ كەلسە-داعى،
ايتۋعا ءبىر اۋىز ءسوز تابا المادى.
ارۋاعى ەر عالىنىڭ كۇشتى دەيدى،
مولدا باقىر كوتىنەن ءپىستى دەيدى.
ءسوزىنىڭ كۇندە ايتاتىن بىرەۋى جوق،
مولدانى تامام كاپىر قىستى دەيدى.
قيىن جول قيامەتتىڭ تار، بىلەمىن،
ءتورت شاديار پايعامبارعا جار بىلەمىن.
ءسوزىمنىڭ كۇندە ايتقان بىرەۋى جوق،
ءبىر ادام پايعامباردان بار بىلەمىن.
مولدانىڭ كوڭىلى بولدى كۇپتى دەيدى،
ءبىر اۋىز ءسوز تابا الماس ءتىپتى دەيدى.
- پايعامباردان كىم بار، قانە، وسىندا؟! - دەپ،
كاپىرلەر ءتۇس-تۇس جاقتان ءتىپتى دەيدى.
ول مولدا بۇرىنعىداي كۇلە المادى،
كوڭىلىنە كۇندەگى ءسوز قونا المادى .
كاپىرلەر ءتۇس-تۇس جاقتان تىنتسە-داعى،
عالىنى ىشىندەگى كورە المادى.
ەر عالى ورتاسىندا وتىر جايناپ،
كاپىرلەر دۋلاپ جاتىر كۇلىپ-ويناپ.
عالىنى ىشىندەگى قايدان تاپسىن،
ءبارىنىڭ قويعاننان سوڭ كوزىن بايلاپ.
ارۋاعى ەر عالىنىڭ كۇشتى دەيدى،
مولدا باتىر كوتىنەن ءپىستى دەيدى.
- سەن وتىرىك ايتاسىڭ، ادام جوق! - دەپ، مولدانى:
- ولتىرەم! - دەپ، قىستى دەيدى.
ويلاسام، بيسميللانىڭ ءپىرى وتىر-دى،
كوڭىلگە بيسميللادان سەبەپ كىردى.
- پايعامباردان كەيىنگى مەن بارمىن! - دەپ،
ەر عالى ەرلىگىمەن تۇرەگەلدى.
دامەتپەگەن تاماقتان اش قالادى،
قيامەت قايىم بولعاندا، تاس جانادى.
- مىنەكي، مەن بارمىن! - دەپ، تۇرەگەلدى،
جيىلعان تامام كاپىر باس سالادى.
ەر عالى ءبىر اللاعا نانىپ كەلدى،
بولعانىن ءبىر عاجاپ ءىس تانىپ ءبىلدى .
- ءوزى جاياۋ، ءبىر ادام ءجۇر ەكەن! - دەپ،
عالىنى پاتشاسىنا الىپ كەلدى.
قىلىشىن جاساۋىلدار قايرايدى-مىس،
مىلتىعىن جاساۋىلدار سايلايدى-مىس.
«بۇل كىسىنى قالاي قىلىپ ولتىرەم؟!» - دەپ،
پاتشاسى مولداسى مەن ويلايدى-مىس.
مولدا ايتتى:
- ءجۇر ەكەن بۇل مۇندا كەلىپ،
تالكەكتەپ، ولتىرەيىك مازاق قىلىپ.
بۇل كىسىنى: «اللالاپ» ولتىرەيىك،
موينىنا ءبىر نارسەنى كىنا قىلىپ.
- يا، مولدا، ءسىز ايتساڭىز ولاي قىلىپ،
قۇدايىم بەردى بىزگە وڭاي قىلىپ.
بۇل كىسىنىڭ مىندەتىن سىزگە بەردىم،
ءسىز مۇنى ولتىرسەڭ دە، قالاي قىلىپ.
- ءبىر ادام الدەقالاي كەلىپتى كەز،
جىگىتتەر، شاماڭ كەلسە، قيمىلدا تەز!
تاپساڭ سەن، تابا الماساڭ، ولتىرەيىك،
جۇمباق قىلىپ ايتايىق ەكى اۋىز ءسوز.
مولدا اشپادى عالىعا:
- نانارمىسىڭ؟
مەنىڭ ايتقام ءتىلىمدى الارمىسىڭ؟
جۇمباق قىلىپ ايتامىن ون اۋىز ءسوز،
ءبىر اۋىزىن قالدىرماي، تابارمىسىڭ؟
عالى ايتادى مولداعا:
- نانارمىسىڭ؟
مەنىڭ ايتقام ءسوزىمدى الارمىسىڭ؟
تاپسام، تاپتىم، تاپپاسام، ولەمىن عوي،
تاپسام، ءۇش اۋىز ءسوز ايتايىن، تابارمىسىڭ؟!
مولدا ايتادى:
- سويلەسىپ، تانىسالىق!
تاپپاعاندى قىلىشپەن شابىسالىق.
اۋەلى مەن سۇرايىن، جاۋاپ بەرشى.
كەزەكتەسىپ جۇمباقتى، تابىسالىق!
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرسىن بىلاي.
- ولتىرەرمىن، ويلاماي، تاپشى جىلدام:
«بىر-ەكەۋ بولماق جوق، مۇنىم قالاي؟
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
ول نەگە ەكەۋ بولسىن، شۇپامىر قۇل،
جاراتقان ءبارىمىزدى جالعىز قۇداي.
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرسىن بىلاي.
دەرەۋ باسىڭ كەسەرمىن، تاپشى جىلدام،
ەكەۋ ۇشەۋ بولماق جوق، ونىم قالاي؟
- ۇندەردە نە جاقسى، قۇران ءۇيى،
تۇندەردە نە ءتۇن جاقسى، ءقادىر ءتۇنى.
ول نەگە ۇشەۋ بولسىن، كاپىر دۇشپان،
جاراتقان ءبىر قۇدايدىڭ اي مەن كۇنى!
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
ولتىرتەمىن، ويلاماي، تاپشى جىلدام،
ۇشەۋ تورتەۋ بولماق جوق، ونىم قالاي؟
ايتايىن، بىلگەنىمدى، جيىلعان كوپ،
مەن ايتسام وسىلاي قىپ، بولار ما ەدى؟
ول نەگە تورتەۋ بولسىن، كاپىر دۇشپان،
حۇپتاننىڭ اياعىندا وتىر ءۋاجىپ.
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
ولتىرەمىن، ويلاماي، تاپشى جىلدام،
تورتەۋ بەسەۋ بولماق جوق، ونىم قالاي؟
- ءتورت شاديار: ەكەۋى: ومار، وسپان،
بىرەۋى - حازىرەت عالى - ەلدەن باسقان،
بىرەۋى - ابۋباكىر سىدىق بولار،
ول نەگە بەسەۋ بولسىن، كاپىر دۇشپان؟!
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
ولتىرەمىن، ويلاماي، تاپشى جىلدام،
بەسەۋ التاۋ بولماق جوق، ونىم قالاي؟
- شىراقتىڭ الدى مەنەن ارتى بولماس،
كىتاپتان شىققان ءسوزدىڭ قالتى بولماس.
دارەت پەنەن بەس ۋاقىت ناماز بولار،
شۇنامىر قۇل، ول - بەسەۋ، التى بولماس!
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
ولتىرەمىن، ويلاماي، تاپشى جىلدام،
التاۋ جەتەۋ بولماق جوق، ونىم قالاي؟
- قيامەتتىڭ قىل كوپىرى قيىن جەر مە،
«يسرافيل سورى» - دەگەن قىزىل جەل مە؟
ول نەگە جەتەۋ بولسىن، كاپىر دۇشپان،
جاراتقان يماندىعا التى كاليما.
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
ولتىرەمىن، ويلاماي، تاپشى جىلدام،
جەتەۋ سەگىز بولماق جوق، ونىم كالاي؟
- سەنىڭ ايتقان ءسوزىڭنىڭ ءبارى انىق،
مەنىڭ ايتقان ءسوزىمدى قىلما تانىق.
ول نەگە سەگىز بولسىن، كاپىر دۇشپان،
قىلمىستى قۇل ورنى تۇر - جەتى تامۇق.
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
دەرەۋ باسىڭ الارمىن، تاپشى جىلدام،
سەگىز توعىز بولماق جوق، مۇنىم قالاي؟
- قىلمىسسىز كۇلعا ورىن - جۇماقتان تاق،
ون ەكى يمان كوڭىلىمدە بولادى ناق.
ول نەگە توعىز بولسىن، شۇنامىر قۇل،
قىلمىسسىز كۇلدىڭ ورنى - سەگىز جۇماق (ۇجماق).
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
ولتىرەمىن، ويلاماي، تاپشى جىلدام،
توعىز وي بولماق جوق-تى، ونىم قالاي؟
- اي، كاپىرلەر، مەن ايتايىن ءسوزدىڭ جايىن،
گىايداسى جوق ءسوزىڭدى نە قىلايىن؟!
ول نەگە وڭ بولسىن، شۇنامىر قۇل،
توعىز ۇلدى پايعامبار يبراگيم (يبرايىم)!
- سويلەيىن، سويلە دەسەڭ، جاببار قۇداي،
شاراپاتى مادينەنىڭ تۇرار بىلاي.
ولتىرەمىن، ويلاماي، تاپشى جىلدام،
ون ون ءبىر بولماق جوق، مۇنىم قالاي؟
- جەتى قابات جەر مەن كوك - ءبارى عالام،
بەيىش بەتىن كورە الماس قىلعىستى ادام .
ول نەگە ون ءبىر بولسىن، شۇنامىر قۇل،
ون اي كۇرساق كوتەرگەن ۇرعاشى ادام.
ول دۇنيە بۇل دۇنيەدەن قاتتى دەيدى،
قىزىعى بۇ دۇنيەنىڭ ءتاتتى دەيدى.
ول مولدا ون اۋىز ءسوز ايتىپ ەدى،
ءبىر اۋىزىن قالدىرماي تاپتى دەيدى.
عالى ايتتى:
- تىلىمە نانارمىسىڭ،
مەنىڭ ايتقان ءتىلىمدى الارمىسىڭ؟
ون ءسوزدى ايتىپ ەدىڭ، ءبارىن تاپتىم،
مەن ءۇش اۋىز ءسوز ايتايىن، تابارمىسىڭ؟
-كوپ ءسوزىڭ بار ىشىڭدە سەنىڭ- دەيدى،
- اشۋىما كوپ تيمە مەنىڭ! - دەيدى.
- الدە نە دەپ ايتاسىڭ ماعان؟ - دەيدى،
- ول ءسوزىڭدى ايتپايمىن سەنىڭ ! - دەيدى.
ارۋاعى ەر عالىنىڭ كۇشتى دەيدى،
كوتىنەن مولدا باقىر ءپىستى دەيدى.
- بۇ ايتقان سوڭ، سەن نەگە ايتپايسىڭ؟ - دەپ،
مولدانى تامام كاپىر قىستى دەيدى.
- قويمادىڭ، اي، پاتشام، حالىمىزگە،
كەلدى ءبىر زور قايعى شارىمىزگە (شاعارىمىزعا).
مۇنىڭ ايتقان ءۇش ءسوزىن ايتار ەم مەن،
مەن ايتقاندا، ايتار بولساڭ ءبارىڭىز دە.
- وتەرسىڭ ءبىر نارسەنى كوڭىلىڭە الىپ،
تاپپاساڭ، بايعۇس مولدام، بولدىڭ كارىپ.
سەنىڭ ايتقان ءسوزىڭدى ءبىز دە ايتارمىز،
بۇ جەردە نە بولارمىز سەنەن قالىپ؟!
- ايتايىن، سولاي بولسا، مەن! -دەيدى-مىس،
- مەنىڭ ايتقان سوزىمە كون! - دەيدى-مىس.
- ايتاتۇعىن ءسوزىڭدى سۇرا مەنەن،
ءسوزىڭدى ايتشى، بىلەلىك، سەن! - دەيدى - ءمىس.
- ويلاسام، بيسميللانىڭ ءبىرى زات-تى،
بولعاندا ءتىلىم - شەجىرە، كوڭىلىم - حات-تى.
بۇل ءسوزىمدى ويلاماي، جىلدام تاپشى،
جۇماقتىڭ ەسىگىندە نە جاراتتى؟
- قيامەتتىڭ قىل كوپىر جول بار دەيدى،
ۇزىندىعى مىڭ جىلدىق مول بار دەيدى.
جۇماقتىڭ ەسىگىندە ەسىتكەنىم:
«بيسميللا ال-راحمان راحيم!» - سول بار دەيدى.
- ويلاسام، بيسميللانىڭ ءبىرى زات-تى،
بولعاندا تىلىم-شەجىرە. كوڭىلىم - حات-تى.
بۇ ءسوزىمدى ويلاماي، تاپشى جىلدام،
جۇماقتىڭ تاپ تورىندە نە جاراتتى؟
- قيامەتتىڭ قىل كوپىر جول بار دەيدى،
ۇزىندىعى مىڭ جىلدىق مول بار دەيدى.
جۇماقتىڭ تاپ تورىندە ەسىتكەنىم:
«ءلا-يلا-اللا-يلا-اللا!» - سول بار دەيدى.
- ويلاسام، بيسميللانىڭ ءبىرى زات-تى،
بولعاندا تىلىم-شەجىرە، كوڭىلىم - حات-تى.
بۇ ءسوزىمدى ويلاماي، تاپشى جىلدام،
جۇماقتىڭ ماۋەسىندە نە جاراتتى؟
- قيامەتتىڭ قىل كوپىر جول بار دەيدى،
ۇزىندىعى مىڭ جىلدىق مول بار دەيدى.
جۇماقتىڭ ماۋەسىندە ەسىتكەنىم:
«ءلا-يلا-اللا-يلا-اللا» - سول بار دەيدى.
ول مولدا ۇشەۋىن دە ءبىلدى دەيدى،
تىلدەرى كاليماعا كەلدى دەيدى.
- بارىمىزگە ۇستات بولىپ، يمام بولدىڭ،
نە الاسىز بىزدەردەن ەندى؟! - دەيدى.
- جەتكىزگەن مۇندا مەنى ءبىر تورعاي قۇس،
ۇيدەن مەنى شىعارعان جارلى بايعۇس.
نە بەرەرسىز بىزدەرگە، نە بەرمەسسىز،
كەرەك ەدى بىزدەرگە التىن، كۇمىس.
تامام كاپىر مۇسىلمان بولدى دەيدى،
شايتان قاشتى، پەرىشتە تولدى دەيدى.
التىن مەنەن كۇمىستى جيناپ ەدى،
ۇلكەندىگى ءبىر تاۋداي بولدى دەيدى.
ەر عالى ەندى ويلايدى ويدى دەيدى،
التىن مەنەن كۇمىسكە تويدى دەيدى.
ارقاسىندا كوتەرىپ سالىپ ەدى،
ەر عالى كوتەرە الماي، قويدى دەيدى.
ەر عالى ءبىر اللاعا نانىپ كەتتى،
قۇدايدىڭ شەبەرلىگىن تانىپ كەتتى.
ەكىنشىلەي ارقالاپ كوتەرگەندە،
تورعاي قۇس كەلدى دە الىپ، الىس كەتتى.
ەر عالى سابىر قىلىپ، ساسپايدى ەندى،
اللا تاعالا ءبىر جولعا باستايدى ەندى.
ول تورعاي اسپانمەنەن الىپ كەتىپ،
عالىنى ءوز ۇيىنە تاستايدى ەندى.
الىپ كەلىپ كەدەيگە بەردى دەيدى،
كەدەي بايعۇس قۋاتى كۇلدى دەيدى.
كەدەي بارىپ كاپىردىڭ بورىشىن تولەپ،
ءدىن مۇسىلمان مۇنى ەستىپ ءبىلدى دەيدى.


You Might Also Like