بۇل ءان
بۇرىنعى اننەن وزگەرەك،
بۇعان
ۇيقاستى ولەڭ، ءسوز كەرەك
وزىنە ورايلى.
دەنەڭ
جان نۇرلى بولسا، جوندەلمەك،
ولەڭ
انگە ولشەپ ايتسا، وڭدەلمەك،
ۇيقاسسا قولايلى.

ءان – ولشەۋىش،
ولەڭ – كۇمىس،
قوسپاڭىز مىس ارالاس.
ارتىق الۋ،
نە كەم سالۋ،
قاپى قالۋ جاراماس.

اۋىر
وسى انگە تاۋىپ ءسوز سالماق
ءتاۋىر،
تاتىمدى ۇيقاس جينالماق
تەرەڭنەن تولعانىپ.
سىرىن
بۇل ءاننىڭ ايتىپ قارايىن
ءتۇرىن
سيپاتتاپ، ءتىزىپ سانايىن،
ولەڭ تاپ ويلانىپ.

بۋىنى سەگىز،
التاۋى ەگىز،
ۇشەم دەڭىز ەكەۋى.
كىم ءدال باستى،
كىلتىن اشتى،
جاقسى ۇيقاستى نەشەۋى؟

قايران
قايعىسىز، قامسىز كۇندەرىم،
سايران
ساۋىقتى راحات تۇندەرىم،
سەندەردەن نە پايدا؟
اسقان
الپىستان مىناۋ جاسىمىز:
قاشقان
شالدىقتان عارىپ باسىمىز،
قالاسىڭ قاي سايدا؟!

نوقتالى باس،
اعىزىپ جاس،
قىزۋسىز ماس، جەلىكسىز،
حاققا كونىپ،
جالىن سەنىپ،
كورگە ءتونىپ ەرىكسىز.

جاستىق
جالىنسام جانە كەلەر مە،
ماستىق
دەنەمە قىزۋ بەرەر مە؟
سۋىنعان تۇلا بوي.
ماعان
قاراما، كوڭىلىم، مۇڭايىپ،
ساعان
جەتكىزبەس، كەتكەن ول عايىپ،
جاس ءومىر – وتكەن توي.

بۇل الپىستى،
تۇسكەن ءتىستى،
توزعان ءتۇستى جاسىمدا
سوگۋشى ەدىم،
وپىق جەدىم،
ءبارى مەنىڭ باسىمدا.

تاعدىر
ادامدى ايداپ تۋعىزباق،
ءاربىر
سۇيگەنىن ءناپسى قۋعىزباق -
ءومىردىڭ جولى بۇل.
جاقسى
ءناپسىسىن ءوزى بيلەمەك،
تاپشى
ناداندى ءناپسى سۇيرەمەك،
ماقتانعا بولىپ قۇل.

اتا-اناسى،
اينالاسى،
زامانداسى قىلعان ءىس
ءتالىم بەرەر،
سوعان ەرەر،
تاعى كەلەر ءبىر تۋىس.

---