ءىشىم ولگەن، سىرتىم ساۋ،
كورىنگەنگە دەيمىن-اۋ:
بۇگىنگى دوس - ەرتەڭ جاۋ،
مەن نە قىلدىم، ياپىرماۋ؟!
ءوز ۇيىندە وزەندەي،
كۇركىرەيدى، ايتسا داۋ.
كىسى الدىندا كىربەڭدەپ،
شابان، شارداق1 جانە شاۋ2.
مۇنداي ما ەدىڭ انا كۇن،
مۇنىڭ قالاي، باتىر-اۋ؟
ءۇش كۇن ارقاڭ بوساسا،
بولا قالدىڭ باس اساۋ.
جان قىسىلسا، جايتاڭداپ،
جاندى ەرىتكەن جايدارى-اۋ.
جان جاي تاپسا، سەن نەگە
جات مىنەزسىڭ جابىرقاۋ؟
ۇرلىق پەنەن قۋلىققا،
بايلاعاندا، كەستىڭ باۋ.
بەرەرمەندە بەسەۋسىڭ،
الارماندا جانە التاۋ.
توپ بولعاندا كورەرسىڭ
ءتۇرلى داۋدى ءجۇز تاراۋ.
اياعىندا سەندەيلەر،
كورمەي ءجۇر مە قانتالاۋ؟
قايتىپ كەلەر ەسىكتى،
قاتتى سەرىپپە، جارقىن-اۋ!
جەتىلسەڭ دە، جەتسەڭ دە،
كەرەك كۇنى ءبىر بار-اۋ.

1 دارمەنسىز
2 توسىرقاپ، توقىراپ قالۋ

---