جۇرەگىم، نەنى سەزەسىڭ،
سەنەن باسقا جان جوق پا؟
دۇنيەنى، كوڭىلىم، كەزەسىڭ،
تياناق جوق پا، قوي، توقتا!

سەزگەنىڭدى سەزدىرىپ،
جەتە المادىڭ ورتاققا.
ءتىرى جاننان بەزدىرىپ،
اپاراسىڭ قاي جاققا؟
ورتاقتىق، تىنىشتىق دوستىق قوي،
ونىڭ ءقادىرىن كىم بىلەر؟
اركىمگە-اق تىلەۋ قوستىق قوي،
ءبارى — الدامشى ساۋداگەر.

حالىقتىڭ اتى كەرەك قوي
يا ماقتاۋعا، بوقتاۋعا.
قۇبىلعا ءبارى زەرەك قوي،
ءبارى جايسىز توقتاۋعا.

دوستى قايدان تاباسىڭ،
كەڭەسەرگە ادام جوق.
ارلى-بەرلى شاباسىڭ،
جالعىزدىقتان جامان جوق.

اقىل ايتساڭ بىرەۋگە
ءىشىڭ ەرىپ، ەگىلىپ،
ۇيالماس اقى تىلەۋگە،
بەرمەسەڭ قالار ءتۇڭىلىىپ.

اقى بەرىپ تىنداتقان
ءسوز كوكەيگە قونار ما؟
قۇلاعىن ساتقان ءتاڭىرى اتقان
وڭدىرار ما، وڭار ما؟

كۇيەسىڭ، جۇرەك، كۇيەسىڭ،
كۇيگەنىڭنەن نە پايدا؟
دۇنيەدە نەنى سۇيەسىڭ،
ءومىر قايدا، دوس قايدا؟

---