كوگىلدىر داقتى سكات
كوگىلدىر داقتى سكات – تۇتاسقاناتتىلار – تاقتاجەلبەزەكتەر وتريادىنىڭ جوعارى توبىنا جاتاتىن بالىقتار. ولار – اتلانت مۇحيتىنىڭ وڭتۇستىك-شىعىسىندا، وڭتۇستىك افريكا جانە موزامبيك سۋلارىندا تىرشىلىك ەتەدى.
كوگىلدىر داقتى سكاتتىڭ ۇزىندىعى 40-70 سم ارالىعىندا بولادى. جالپاق تۇمسىعى ءۇشبۇرىشتى. دەنەسىنىڭ جارتىسىن قۇيرىعى الادى. ەسەيگەن كەزدەرىندە دەنەسىنىڭ ۇستىڭگى جاعىندا اقشىل-كوك داق جانە قارا نۇكتەلەر، قۇيرىعىندا اق جانە قارا ساقينالار پايدا بولادى.
سكاتتىڭ اۋىز قۋىسىندا ەكى تۇتىگى بولادى، سونىڭ كومەگىمەن اسشاياندار مەن تەڭىز شاياندارىن باقالشىقتارىنان سورىپ الادى.
وسى ءبىر اشىق ءتۇستى سكات ىرىلىگىمەن كوزگە تۇسەدى. دەنەسىنىڭ ۇستىندە كوگىلدىر داقتارى بار. قاناتتارى دوڭگەلەكتەنە كەلىپ، تۇمسىعىمەن جالعاسىپ كەتكەن. قۇيرىعىنىڭ ەكى جاعىندا دا كوك جولاقتارى بار. ۇزىن قۇيرىعىنىڭ ۇستىڭگى جاعىندا شانىشقى سياقتى مۇشەسى بولادى. جاۋىنان قورعانعاندا وسى قۇيرىعىمەن ۇرىپ ساقتانادى.
كوگىلدىر داقتى سكاتتار توپتالىپ تاياز، قۇمدى سۋلارعا مولليۋسكالارمەن، قۇرتتارمەن، تەڭىز شاياندارىمەن قورەكتەنۋى ءۇشىن قونىس اۋدارىپ تۇرادى. بۇل سكاتتار 100 مەتر تەرەڭدىكتە تىرشىلىك ەتەدى. ولار مارجاندى ريفتەردە تىرشىلىك ەتكەندى جاقسى كورەدى. 9 ايعا سوزىلاتىن جۇكتىلىك كەزەڭىنەن كەين، 1-5 ۇرپاعىن ومىرگە اكەلەدى.
You Might Also Like
