كوڭىل قۇسى قۇيقىلجىر شارتاراپقا
كوڭىل قۇسى قۇيقىلجىر شارتاراپقا،
ادام ويى تۇرلەنىپ اۋعان شاقتا.
سالعان ءان — كولەڭكەسى سول كوڭىلدىڭ،
تاكتىسىنا بيلەسىن ول قۇلاققا.

شىرقاپ، قالقىپ، سورعالاپ، تامىلجيدى،
جۇرەك تەربەپ، وياتار باستا ميدى.
بۇل دۇنيەنىڭ ءلاززاتى ءبارى سوندا،
ويسىز قۇلاق الا الماس ونداي سىيدى.

¥يىقتاپ جاتقان جۇرەكتى ءان وياتار،
ءۇننىڭ ءتاتتى ورالعان ءمانى وياتار.
كەيى زاۋىق، كەيى مۇڭ، دەرتىن قوزعاپ،
جاس بالاشا كوڭىلدى جاقسى ۋاتار.

ادام از مۇنى ءبىلىپ ءان سالارلىق،
تىڭداۋشى دا از ول اننەن ءباھرا الارلىق.
مۇڭمەن شىققان، ورالعان ءتاتتى كۇيگە
جىلى جۇرەك قايدا بار قوزعالارلىق؟

كوبىنەسە ءان باسى كەلەدى اششى،
"كەل تىڭدا!" دەپ وزگەگە بولار باسشى.
كەرىم تولعاپ، تاۋىسار قاڭعىر-كۇڭگىر
سول جەرىنە ويىڭمەن ارالاسشى.

ءاننىڭ دە ەستىسى بار، ەسەرى بار،
تىڭداۋشىنىڭ قۇلاعىن كەسەرى بار.
اقىلدىنىڭ سوزىندەي ويلى كۇيدى
تىڭداعاندا، كوڭىلدىڭ وسەرى بار.

بىلىمدىدەن ايامان ءسوزدىڭ مايىن،
التى ولەڭمەن ءبىلدىردىم ءاننىڭ جايىن.
ەزدىڭ باسى قاڭعىرسىن، ەردىڭ كوڭىلى
جاڭعىرسىن دەپ ويلادىم ايتقان سايىن.
كوكىرەگىندە وتى بار ويلى ادامعا
بۇل ءسوزىمنىڭ سۋرەتى تۇرار دايىن.


You Might Also Like

جاڭالىقتار

جارناما