مال جيماق
ماقتان ءۇشىن مال جيما، جان ءۇشىن جي،
قازاققا كوز سۇزبەستىڭ قامى ءۇشىن جي.
ارىڭ ساتپا، تەرىڭ سات، الالدى ىزدە،
عيبادات پەن ادالدىق، ار ءۇشىن جي.

ەرىنبەسەڭ ەڭبەككە، داۋلەت دايىن،
جاراتقان جوق جاتسىن دەپ ءبىر قۇدايىڭ.
ويلاسىن دەپ وي بەردى، كورۋگە كوز،
اياق بەردى، تاپسىن دەپ باسقان سايىن.

ۇيدە وتىرىپ سالعانمەن سارى ۋايىم،
تىلەگەنىڭ تۇرا ما ساعان دايىن.
ءجۇرىپ-تۇرىپ، ويلانىپ ىستەپ كورسەڭ،
حارەكەتتىڭ بىلەسىڭ سوڭدا جايىن.

جاتىپ ىشكەن – جان تىنىش، سالعىرت-سالاق،
وعان ارام – حارەكەت، وي ويلاماق.
ىزدەمەگەن كىسىگە قايدان كەلسىن
تازا كيىم، جىلى ورىن، ءتاتتى تاماق.

ەگىن سال، نە ساۋدا قىل، مالىڭدى ب ا ق،
ءبىلىم بىلمەك – ءار ىسكە شەبەر بولماق.
قول ونەردەن پايدا قىل ۇيرەنىپ-اق،
كەتپەس داۋلەت وسى عوي قۇدايعا حاق.

قول ونەر ءوزىڭ ولسەڭ بىرگە ولەدى،
سوندا-داعى قالعاندار ۇيرەنەدى.
سەن كەتسەڭ دە ونەرىڭ ەلدە قالىپ،
تالاي جانعا ازىق پەن مال بەرەدى.

ءارى ەرمەك، ءارى پايدا، ءارى دۇرىس،
دەمەيدى قول ونەردى ەشكىم بۇرىس.
كورىنگەنگە كوز ساتىپ جالىنعانشا،
كۇندىك ءومىر قالسا دا سوعان تىرىس.

دەپ ويلاما بۇيرىقسىز داۋلەت قايدا،
جالىقپاي تالاپ ەتسەڭ – دايىن پايدا.
ادال قول اشتان ولمەس، قۇرى قالماس،
«جۇرگەن الار» دەگەن عوي ءبىر قۇداي دا.

تالاپپەن ادال ءىستى ىستەمەكپىز،
تاپسىردىق ءبىر اللاعا ءبىز دەمەكپىز.
ىندىنىڭ تازا بولسا، يمەنبەڭىز،
داۋلەتتى وسىلايشا ىزدەمەكپىز.

قۇدايدان ارام ءىستى تىلەمەك جوق،
ۇيتسەڭ تيەر كەۋدەڭە ءبىر جامان شوق.
ۇيالماي قۇداي اتىن اتايمىسىڭ،
ناپسىڭە ەرىپ جەپ جاتىپ ءبىر ارام بوق.

قۇداي تازا جاراتتى، سەن تازا بول،
ۇقساڭ، انىق ايتتىم عوي، بۇل – تۋرا جول.
ماقتان كۇيلەپ، ارامنان مال جيناساڭ،
ورنىڭ – دوزاق، سورلى، سەن، ايتقانىم سول.


You Might Also Like

جاڭالىقتار

جارناما