بىرەۋ سەنى ماقتاسا، قۋاناسىڭ،
جامانداسا، جابىرقاپ، سۋالاسىڭ.
ماقتاعان كىم، سوككەن كىم –وندا ءىسىڭ جوق،
ءبارى – ءبىر، سەن دە ەلەرمە دۋاناسىڭ.

دوس ماقتاسا، نە پايدا ونان ساعان،
دۇسپان سوكسە، نە كەمدىك كوردىڭ جامان؟
شىن سوزبەنەن ماقتاسا، ءيا بوقتاسا،
ماقتاۋ پايدا، زيان با جامانداعان؟

بويدا جوقپەن ماقتاسا ياكي سوكسە،
قۋانباق نە كەيىمەك وزىڭە ەپ پە؟
ءادىل جۇرەك، تازا اقىل ماقتايتۇعىن،
سولار سوكپەس ءىس قىلار جولدى كوكسە.

دوس ماقتايدى سەن جاقسى كورمەك ءۇشىن،
دۇسپان ماقتار ەلەرتە بەرمەك ءۇشىن.
ەسەپتەمەي ەسىرىك ەلىڭ ماقتار،
كوپ نەنى ايتسا، سونى ايتىپ ەرمەك ءۇشىن.

بۇل ءۇش ماقتاۋ بەرەر مە ساعان پايدا،
ماقتاۋلىنى بىلەرلىك ادام قايدا؟
وزىڭنەن ىلگەرىلەر سۇيسىنەرلىك
جول تاپ-تاعى اقىلدى سولاي ايدا.

كەيدە دوس تا جاماندار جوق نارسە ءۇشىن
دۇسپان سوگەر سىرتىڭنان قايراپ ءتىسىن.
ونەرى جوق، وسەكشىل ەل جاماندار،
وتىرىك پە، راس پا، كورمەي ءىشىن.

كەلەر-كەتەر زيان جوق مۇنان تاعى،
ءمىن بولمايدى ناداننىڭ قورلاماعى.
بىلىمدىلەر سوگەرلىك ءىسىڭ بولسا،
جوعالتا بەر ايلاسىن، ويلا-داعى.

تاۋىپ ايتقان تالاسسىز ماقتاۋ، بوقتاۋ،
جاقسى ىسكە ىندىن، زيانعا سالار توقتاۋ.
كوپ ناداننىڭ سوزىمەن قۇيقىلجىساڭ،
سەن دە جىندى بولاسىڭ ەسى جوقتاۋ.

---