InfoHub Logo

مەملەكەتتىك رامىزدەر تاريحى

تاۋەلسىزدىك العان جاس مەملەكەت رەتىندە قازاقستان ءۇشىن مەملەكەتتىك رامىزدەردى قابىلداۋ ماڭىزدى جانە جاۋاپتى ءىس بولدى. 1992 جىلدىڭ باسىندا جوعارعى كەڭەستىڭ ءتورالقاسى مەملەكەتتىك سيمۆوليكانى دايىنداۋ بويىنشا جۇمىس توبىن قۇرۋ تۋرالى قاۋلى قابىلدادى. وسى قۇجاتقا سايكەس، ارنايى شىعارماشىلىق كوميسسيا قۇرىلدى، ونىڭ قۇرامىنا بەلگىلى زاڭگەرلەر مەن قوعام قايراتكەرلەرى كىردى.

مەملەكەتتىك رامىزدەردىڭ جوبالارىن ازىرلەۋ ءۇشىن كونكۋرس جاريالانىپ، وعان 600-دەن استام ادام قاتىستى. مەملەكەتتىك تۋ ەسكيزدەرىنىڭ شىعارماشىلىق ديزاينى بويىنشا 1200 ءوتىنىم، 245 سۋرەت جوباسى جانە بولاشاق ەلتاڭبانىڭ 67 سيپاتتاماسى ۇسىنىلدى. مەملەكەتتىك گيمننىڭ 750 نۇسقاسى بولدى. جوبالار بولاشاق مەملەكەتتىك رامىزدەردىڭ تاريحي، ساياسي جانە ەكونوميكالىق سيمۆوليزمگە سايكەس كەلۋى، سونداي-اق جاس مەملەكەتتىڭ ساياساتى مەن ماقساتىن ايقىن كورسەتۋى ءتيىس ەدى.

مەملەكەتتىك رامىزدەر

ق ر مەملەكەتتىك تۋى – ورتاسىندا شۇعىلالى كۇن، ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا. تۋدىڭ سابىنىڭ تۇسىندا ۇلتتىق ورنەك تىك جولاق تۇرىندە ناقىشتالعان. كۇن، ونىڭ شۇعىلاسى، قىران جانە ۇلتتىق ورنەك بەينەسى التىن تۇستەس. تۋ اۆتورى – شاكەن نيازبەكوۆ.

ق ر مەملەكەتتىك ەلتاڭباسى – دوڭگەلەك نىساندى جانە كوگىلدىر ءتۇس اياسىنداعى شاڭىراق تۇرىندە بەينەلەنگەن. شاڭىراقتى اينالا كۇن ساۋلەسىندەي تاراپ ۋىقتار شانشىلعان. شاڭىراقتىڭ وڭ جانە سول جاعىندا اڭىزدارداعى قاناتتى پىراقتار بەينەسى ورنالاسقان. جوعارعى بولىگىندە – بەس بۇرىشتى كولەمدى جۇلدىز، ال تومەنگى بولىگىندە «قازاقستان» دەگەن جازۋ بار. ەلتاڭبا اۆتورلارى – جانداربەك مالىبەكوۆ پەن شوت-امان ءۋاليحانوۆ.

ق ر مەملەكەتتىك گيمنى – بۇرىن «مەنىڭ قازاقستانىم» ءانى رەتىندە تانىمال بولعان. 2006 جىلى 6 قاڭتاردا پارلامەنتتە بەكىتىلگەن. ءاننىڭ اۆتورى – ءشامشى قالداياقوۆ، ءسوزىن جازعاندار – جۇمەكەن ناجىمەدەنوۆ، نۇرسۇلتان نازاربايەۆ.

مەملەكەتتىك رامىزدەردىڭ قورعالۋى

قازاقستاندا مەملەكەتتىك رامىزدەرگە قاتىستى ارنايى زاڭنامالىق تالاپتار بار. مەملەكەتتىك مەكەمەلەردىڭ كىرەبەرىسىندە ورنالاساتىن مەملەكەتتىك تۋعا تۇنگى ۋاقىتتا دا جارىق ءتۇسىپ تۇرۋى شارت. مەملەكەتتىك تۋ مەن ەلتاڭبانىڭ ورنالاسۋ رەتى ارنايى تالاپتارعا سايكەس بولۋى كەرەك.

2020 جىلدان باستاپ مەملەكەتتىك رامىزدەردى كەڭىنەن قولدانۋعا رۇقسات بەرىلدى. قاسىم-جومارت توقايەۆتىڭ تاپسىرماسىمەن ازاماتتار مەملەكەتتىك تۋدى پاتريوتتىق ماقساتتا تۇرعىن ۇيلەرىنىڭ بالكوندارىنا، تەرەزەلەرىنە نەمەسە كولىكتەرىنە ىلۋگە مۇمكىندىك الدى.

الەم ەلدەرىندەگى مەملەكەتتىك رامىزدەردىڭ قورعالۋى

الەمنىڭ كوپتەگەن ەلىندە مەملەكەتتىك رامىزدەر زاڭمەن قورعالادى. مىسالى، گەرمانيادا مەملەكەتتىك تۋىن، ەلتاڭباسىن جانە ءانۇرانىن قورلاعانى ءۇشىن ءۇش جىلعا دەيىن باس بوستاندىعىنان ايىرۋ جازاسى بار. فرانسيادا مەملەكەتتىك ءانۇراندى نەمەسە تۋدى قورلاعانى ءۇشىن 7،5 مىڭ ەۋروعا دەيىن ايىپپۇل سالىنادى جانە التى ايعا دەيىن تۇرمەگە قاماۋ قاراستىرىلعان. بەلارۋستە ەلدىڭ ەلتاڭباسىن، تۋىن، ءانۇرانىن قورلاعانى ءۇشىن ەڭ كوپ جازا – ءبىر جىلعا دەيىن باس بوستاندىعىن شەكتەۋ.

مەملەكەتتىك رامىزدەردىڭ ماڭىزى

قازاقستاننىڭ مەملەكەتتىك رامىزدەرى ەلدىڭ سيمۆولى، تاۋەلسىزدىگىنىڭ ماڭىزدى بەلگىسى بولىپ تابىلادى. ولار قازاقستاندىقتاردىڭ بارلىق جەڭىسى مەن جەتىستىكتەرىن الەمدىك ارەنادا كورسەتىپ كەلەدى. تالعات مۇسابايەۆتىڭ عارىش ستانسياسىندا مەملەكەتتىك تۋدى كوتەرىپ، ءسوز سويلەگەنىنە دە 28 جىل ءوتتى. ايدىن ايىمبەتوۆتىڭ ۇشۋى كەزىندە ق ر مەملەكەتتىك تۋى جەر پلانەتاسىن 150 رەت شارلادى.

مەملەكەتتىك رامىزدەرىمىزدى ۇلىقتاۋ تەك 4 ماۋسىمدا عانا ەمەس، جىل بويى جۇيەلى تۇردە جۇرگىزىلۋى ءتيىس. بۇل قازاقستاندىق ءپاتريوتيزمدى قالىپتاستىرۋ جانە ەلدىڭ بەدەلىن نىعايتۋ جاعىنان وتە ماڭىزدى. مەملەكەتتىك رامىزدەرىمىزدىڭ ءمانى مەن ماڭىزىن تەرەڭ ءتۇسىنىپ، ولاردى قادىرلەۋ ءاربىر ازاماتتىڭ بورىشى.

4 ماۋسىم - قازاقستان رەسپۋبليكاسىنىڭ مەملەكەتتىك رامىزدەر كۇنى.